May "witness" pabor sa polis

Gipanalipdan sa usa ka retiradong koronel si SPO1 Romeo Cabrera, polis sa Citom labot sa giatubang niining kaso human masikop sa National Bureau of Investigation sa usa ka entrapment gumikan sa pagpangilkil niadtong Lunes.

Si Retired Col. Antonio Medija ang mipatim-aw kagahapon sa buhatan sa Cebu City Police Office ug nangangkong sinugo niya si Cabrera aron pagkuha sa katunga sa bayad sa danyos sa sakyanan sa ugangan sa iyang anak  nga si Gerardo Cristobal.

Matud pang Medija sa mga tigbalita kagahapon ang P10 mil nga giingong “gikilkil” ni Cabrera kang Almar Cabahug, uyab sa suspek nga dinakpan sa Citom nga si Patrick Tambog,  bayad kadto sa danyos sa PUJ ni Cristobal nga ilang nasabutan tungod sa pagdasmag ni Tambog sa PUJ ni Cristobal nga maoy operator niadtong pasaheroang jeepney.

Si Cabrera gidakop diha sa usa ka mall sa dalan N. Bacalso Avenue sa entrapment sa NBI tungod sa reklamo ni Cabahug nga gipangayoan siya niini og P200,000 aron dili magpatong-patong ang kaso sa iyang uyab lakip na ang may labot sa illegal nga drogas.

Gikatahong apil sa sabot mao nga tugutan kining makig-date sa maong babaye apan misumbong si Cabahug sa NBI hinungdan nga natigayon ang entrapment.

Sumala pang Medija, nianang Pebrero 10 miadto siya sa Citom aron hikayon ang pagkadasmag sa sakyanan ni Cristobal subay usab sa hangyo niini gumikan kay paralitiko na kini ug maglisod og lakaw.

Gikatahong nagkasabot na si Cristobal ug Tambog ingon man ni Cabahug nga bayran lang og P20,500 ang danyos sa sakyanan ug ang P10 mil inisyal lang kadtong bayad.

Apan samtang diha siya sa maong buhatan nakadawat siya og pahibalo sa cellphone nga naa na ang kwarta ni Cabahug apan di siya buot mopakita sa buhatan sa Citom kay nahadlok kini kang Tambog nga basin masuko.

Hinungdan nga si Cabrera nga nakahimamat na ni Cabahug tungod sa pagkasikop kang Tambog, maoy gihangyo ni Medija nga maoy mokuha sa kwarta diha sa maong mall gumikan kay dili man sila (Medija ug Cabahug) managkaila.

Apan nahibulong nalang siyang wala na makabalik ang maong polis ug iya nalang nahibaw-ang nadakpan kini sa entrapment sa NBI. Si Medija nagkanayon nga wala hinuon siya makahibalo kung dunay personal nga transaksyon si Cabrera sa maong babaye.

“I am here to speak the truth that it was really my request to Cabrera to get the money and also through the request of the PUJ owner Mr. Gerardo Cristobal….to receive the money in behalf of Cristobal for the repair of the PUJ that was damaged by the paramour of Miss Almar Cabahug,”asoy pang Medija.

Hinuon giangkon niini nga aduna gyuy sayop si Cabrera human wala kini magdala’g kauban ug miisyu og official receipt kang Cabahug apan dako iyang pagtoong na-frame up ang maong police.

Sa iyang bahin ang hepe sa Traffic Police Chief Inspector Jonathan Abella mipadayag  gidili ang pagdawat og kwarta diha sa gawas bisan na og settlement sanglit dunay proseso niini nga ang duha ka habig magpinirmahay diha sa blotter.

Matud pang Abella nga naikog lang mobalibad sa hangyo ang iyang mga sakop tungod kay kanhi opisyal usab sa kapolisan si Medija ug wala sila magdahom nga ingon niadto ang mahitabo kang Cabrera.