Bayot, tomboy ok na sa PNP

Subling gipahibalo sa Philippine National Police (PNP) nga mahimo nang moladlad daan ang mga mahuyang ug tomboy nga dunay interes mag-polis.

Kini tungod kay giingong wala gipatigbabaw sa PNP ang diskriminasyon sa third sex kung kini tiunay nga moserbisyo sa publiko ilabi na sa kampanya batok sa kriminalidad.

Ang pagdawat sa bayot ug tomboy nga gustong mag-polis nakaangkon og pagsuporta gikan kang  Konsehal Augustus Pe Jr.

Alang sa konsehal nga maoy chairman sa Committee on Public Order and Safety sa City Council, dunay kapabilidad usab ang third sex nga mag-polis.

“Mahimo man gani sa mga babaye nga nagpulis, we can’t discriminate, dugay na man na nga gipatuman,” nagkanayon ang konsehal.

Apan nasayran gikan sa director sa PNP Academy nga si Chief Supt. Danilo Abarzosa, nga wala pa silay nadawat nga aplikasyon gikan sa usa ka bakla o tomboy.

Kini ang hinungdan nga subli nilang gipahibalo ang pagdawat niadtong mga bakla ug tomboy nga gustong mag-polis apan nagduha-duha sa pagsulod sa organisasyon.

Duha ra hinuon ang kapilian sa mga binuhat nga anaa sa third sex kun sila makahukom pagsulod ug magpasakop sa PNP organization.

Matud sa tigpamaba sa PNP nga si  Supt. Nicanor Bartolome nga male ug female ra ang anaa sa ilang aplikasyon.

Kini nagpasabot nga kung male ang pilion sa bakla nga aplikante, kinahanglang mulihok kini isip usa ka lalaki, ug babaye usab sa tomboy kung female ang gusto niini.

Bisan kung wala pay bakla o tomboy nga lantarang ni-apply sa pagkapulis, apan dili malimod sa PNP organization nga dunay pipila ka aktibong sakop niini nga kadudahan ug lihok.

Gani gikataho na kaniadto nga dunay pipila ka mga machong pulis didto sa kauluhan, ang niladlad ug niangkon nga sila mga bakla.