Lalaki giatake sa sakit namatay sa dalan

Patay na nga nahidangat sa Mandaue City District Hospital ang usa ka wala hiilhing lalaki nga gituohang giatake sa sakit sa kasingkasing niadtong Miyerkules sa gabii sa sitio Bildohan, barangay Umapad, dakbayan sa Mandaue.

Ang namatay nga adunay patik sa tuong bukton nga nagdala sa litra nga “Langging” ang gibanabanang anaa sa 40 kapin ang panuigon, mokabat sa lima ka tiil ug upat ka pulgada ang gitas-on sa pamarog niini.

Si PO1 Ryan  Sarabia sa Presinto 5 sa Opao Police Station nga nahinabi sa Banat News miingon nga ilang nadawat ang taho gikan sa mga lumolupyo labot sa wala hiilhing lalaki nga kalit lang nawad-an sa iyang panimuot ug nahagba sa yuta.

Matud pa niya nga dali kining gikarga sa ambulansiya sa mga sakop sa Accident Control and Emergency  Rescue Team (ACERT) sa dakbayan ug gidala kini sa Mandaue City District Hospital.

Ang mga doktor sa maong tambalanan nga nagtinabangay sa pag-atiman sa maong wala hiilhing lalaki ang mideklarar nga patay na kining nahidangat kanila.

Dugang pa ni PO1 Sarabia nga ang patay’ng lawas sa maong wala hiilhing lalaki ang kasamtangan karong gipahiluna sa morgue sa maong tambalanan ug gipaabot ang mga kabanay nga moila niini. (Romeo T. Limpangog)