Tulo ka priso sa Consolacion nakapuga

Tulo ka mga piniriso sa lungsod sa Consolacion  nakapuga niadtong milabay’ng Martes sa alas 4 sa hapon pinaagi sa pagguba sa rehas sa ilang selda nga wala gyud mabantayi sa nag-duty nga mga polis.

Ang mga nakapuga nga piniriso naila nga sila si Lito Blanco, hingkod ang panuigon,taga Pulpogan Consolacion, ug nag-atubang og kaso nga paggamit og marijuana.

Samtang ang duha ka mga kauban niini naila nga sila si Gabriel Entera  ug Rogelio Miñoza,  pulos mga molupyo sa Nasipit, Talamban ning dakbayan sa Sugbu.

Gibutyag ni PO3 Allan Maglangit sa Consolacion Police Station dihang nahinabi sa Banat News nga gitabangan og guba sa maong mga piniriso ang rehas sa selda niini nga wala maayo pagka-welding ug tayaon na hinungdan nga naka-eskapo kini ilabi na kay ang bilanggoan nahimutang luyo nga bahin sa police station.

Ang mga piniriso na sa tupad nga selda maoy mipahibalo sa mga polis sa nakapuga nga piniriso hinungdan nga mihimo dayon kini og hot pursuit operation ug ilang nasikop og balik si Blanco nga mipauli sa ilang pinuy-anan sa Pulpogan, Consolacion pipila ka oras human sa pag-eskapo niini.

Ang hepe sa Cebu Police Provincial Office (CPPO) Sr. Supt. Carmelo Valmoria  mimando dayon ngadto sa hepe sa kapulisan sa Consolacion Insp. Leoncio Baligwat Jr. pagdakop sa nahabiling duha ka pugante sa labing daling panahon.

Gimanduan usab ni Valmoria si Baligwat pagpaubos sa imbistigasyon sa mga duty officers sa dihang nahitabo ang pagpuga.

Hinuon nasayran gikan kang Insp. Baligwat sa dihang nahinabi sa Banat News nga ang mga duty officers niadtong higayona naglangkob nila ni SPO2 Rizalino Aligno, PO2 Ruben Allen ug PO1 Romulo Sasing.

Gidugang ni Insp. Baligwat nga ang duha ka mga pugante nag-atubang kini og kasong pagpangawat og mga manok igtatari ug nabalhug sa bilanggoan alas 9 niadtong Martes ug nipuga pagka hapon.