Valmoria gihulga sa polis
Dunay laing 36 ka mga polis nga nadestino sa kalungsoran sa lalawigan sa Sugbu ang girekomendar sa Provincial Investigation and Detective Management Branch nga dili hataga’g usa ka adlaw nga suweldo ingon man dili makadawat sa ilang mga bunos karung tuiga sa bulan sa Disyembre.
Kini human mapakyas pagtunga sa gipahigayong International Defensive Pistol Association kon Mamang Polis, usa ka Flagship Program sa Philippine National Police (PNP)sa nilabay'ng Septembre 21, 2007.
Sa sayo pa, niadtong miaging semana dunay nahaunang 17 ka mga polis ang girekomendar usab sa PIDMB sa susamang silot ngadto kang CPPO Director Sr. Supt. Carmelo Valmoria, samtang dunay 13 ka mga polis sa kinatibuk-ang 30 ang gipasaylo ni Valmoria tungod sa balidong mga rason apan upat niini ang gipangitaan og dokumento nga nagpamatuod sa ilang mga tubag.
Nasayran ni SPO1 Inihao nga kasagaran sa mga tubag sa mga polis pulos mga “alibi” busa iyang girekomendar ngadto kang Valmoria nga I-forfeit ang ilang bunos.
Gibutyag usab ni Inihao nga sa 36 ka mga polis pipila kanila ang ninghulga nga kasohan si Valmoria kay matud pa, wala sila hatagi og due process.
“Ila nang right nga mopasaka og kaso, let’s see what happen, I want to imposed disciplinary action, it is a warning to each and every one, we have to follow rules and regulations,” pasabot ni Valmoria sa iyang mga sakop.
Susihon usab ni Valmoria ang report nga dunay pipila ka opisyal diha sa CPPO nga nagpaluyo niining mga polis nga mopasaka og kaso batok kaniya.
- Latest
- Trending
