5 tulisan nasikop

Nasikop sa kapolisan ang lima ka mga gidudahang suspetsadong tulisan nga buot untang mobiktima sa usa ka negosyante og baboy didto sa dakbayan sa Danao niadtong Domingo sa alas 4 sa kaadlawon.

Ang mga gidakop nga gidudahang tulisan naila sa mga pangalan nga sila si Pedro Banzon, 25, ulitawo, Rico Pantoja, 16, ulitawo, Julrich Sumisa, 23, ulitawo, Dexter Manco, 19, ulitawo ug Nicasio delos Santos, 30, minyo, pulos mga molupyo sa  dalan Duterte,  barangay Suba sakop sa nahisgutang siyudad.

Gibutyag ni PO1 Cielo Quimat sa Danao City Police Station sa dihang nahinabi sa Banat News gialarma ang maong mga suspek nga buot unta manulis ngadto sa usa ka Clifford Galo, negosyante og baboy sa maong lugar.

Matud pa  nag-atang og sakyanan diha sa barangay Suba si Galo kauban sa usa ka Benjo Reston niadtong alas 4 sa kaadlawon sa Domingo paingon nga mangompra og baboy sa lungsod sa Medellin, Cebu.

Apan kalit lang miabot ang maong mga suspek nga nagpakita og dautang tuyo ngadto kanila hinungdan nga misumbong kini sa kapolisan.

Ang kapolisan sa Danao pinangulohan ni SPO1 Eldefonso Procia daling mitubag sa maong alarma hinungdan nga nasikop ang mga gidudahang tulisan ug sa paghimo ning balita gibalhog na karon sa detention cell sa Danao City Police Station.