Swedish nakuhaa'g rebolber sa balay

Gidakop ug gibalhog sa bilango-an ang usa ka Swedish national   tungod sa pagtiner og armas nga walay lisensiya didto sa iyang kasamtangang gipuy-an sa lungsod sa Argao niadtong milabay'ng Biyernes.

Ang gidakop nga foreigner giila sa pangalan nga si Goren Berson, 55, divorce sa iyang legal nga asawa ug kasamtangang nagpuyo sa barangay Looc, lungsod sa Argao.

Gibutyag ni PO1 Eduardo Semilla sa Argao Police Station, ang kapitan sa barangay Poblacion nga si  Felix Bolciador maoy nangunay sa pagtawag sa kapolisan aron isumbong ang maong langyaw nga nakainom na niadtong higayona ug nagkalalis sa iyang live-in partner.

Nasayran nga si   Bolciador maoy nanag-iya sa giabangan nga panimalay sa maong  Swedish national ug sa live-in partner niining Pilipina.

Matud ni PO1 Semilla dali silang miresponde  ug pag-abot nila sa pinuy-anan niini ilang nakuha gikan sa posisyon ni Berson ang kalibre .38 nga rebolber nga dili lisensiyado hinungdan nga ila  kining gidakop ug gibalhog sa bilanggoan.

Matud ni PO1 Semilla niadtong Biyernes  nila napasaka sa korte ang kasong illegal possession of firearms batok sa maong langyaw.

Nahibaw-an  ning tigbalita atol sa pakighinabi kang pO1 Semilla kagahapon nga anaa gihapon magtingkagol sa bilanggoan ang maong langyaw human wala kini makapiyansa gumikan kay na-apiki kini sa oras tungod kay walay opisina pagka adlaw'ng Sabado og Domingo.