Mokabat sa 100 mil ka pesos ang danyos sa sunog nga nahitabo sa usa ka establisamento nga nagbaligya og mga Korean Cars didto sa CD Seno St. San Miguel Extention Mandaue Reclamation area sitio Maharlika Barangay Tipolo dakbayan sa Mandaue sa milabay’ng gabii.
Ang nasunog mao ang SAUDZ Extreme Auto Supply nga gipanag-iya ni Marine Park usa ka Korean national nga namaligya og mga Korean Cars.
Base sa imbestigasyon ni FO2 Cepriano Codilla sa Mandaue Fire Department nasuta nga usa ka electrical short circuit ang hinungdan sa pag-ulbo sa maong kalayo.
Sa pamahayag ni Jessil Labisto, duty guard sa maong establisamento iyang nakita nga didto magsugod ang kalayo sa ikaduhang andana sa maong edipisyo diin mahimutang ang opisina sa tag-iya.
Gumikan niini dali nga nakatawag og bombero si Labisto ug dali usab ang pagresponde sa mga bombero hinungdan nga natabang dayon ang maong kalayo nga posibleng mokatap unta kini ngadto sa ilang mga naka-display nga mga sakyanan.
Hinuon walay nasamdan o naangol sa maong insedente ug gibanabana sa kabomberohan nga mokabat sa 100 mil ka pesos ang danyos niini.