Human sa pagkasikop sa walo ka rugby boys ug sa magtiayon uban sa ilang duha ka anak gipahugtan karon sa dakbayan sa Talisay ang ilang pakigbatok sa mga manghingosay og rugby nga giingong mikuyanap na sa dakbayan.
Si Konsehal Shirley Belleza kinsa tsirman sa komitiba sa Women, Family and Children mibutyag nga human sa gipahigayon nilang pagpangronda niadtong Huwebes, miawhag siya sa mga tanod sa mga barangay nga hingtungdan nga mopahigayon og higpit nga pag-roving aron masumpo ang mga manghingosay og rugby.
Ang maong pagpangronda miresulta sa pagkasikop sa walo ka minor de edad kinsa tulo kanila ang taga dakbayan sa Naga ug ang usa taga lungsod sa Minglanilla ug ang uban taga dakbayan sa Talisay lakip na niini ang magtiayon nga uban sa ilang duha ka anak.
Matud sa Konsehala nga nakadawat sila og taho sa milabayng tuig nga dunay mga bata nga manghingosay og rugby diha sa Barangay Tabunok ug positibo ang maong taho dihang mipadala sila og mga sakop sa City Social Welfare Development.
Nasuta nga 15 ka mga bata ang naghingos og rugby sa likod sa usa ka shopping center sa nahisgutang barangay.
Ang nahisgutang walo nasikop sa mga sakop sa CSWD diha sa likod sa tindahan og mga VCD sa Tabunok.
Ang konsehala midungag nga mopadangat siya og suwat ngadto sa usa ka hardware nga giingong maoy palitanan og rugby nga ilhon ang mga mopalit kanila og rugby aron masikop ang mga dagko nga nagpasiugda og pamaligya og rugby ngadto sa mga bata.
Base sa taho nga ang mga mopalit og rugby mga dagko diin P22 ang matag lata niini ug ipamaligya og P5 matag plastic ngadto sa mga bata nga mohingosay.