Float sa Akrho "sunogon" unta?

Nakugang ang mga sakop sa Alpha Kappa Rho (AKRHO) fraternity human nila nadiskubrehi nga gusto untang sunogon ang ilang float kagahapon sa kaadlawon.

Base sa taho nga ang maong float sa Akrho  ang gi-estambay diha sa dalan General Maxilom niining dakbayan ug ang maong insidente nabantayan dihang gipentalan kini ni Jomar Anda.

Gikataho nga si Anda gipusil sa usa ka wala mailhing tawo apan swerte kay nakalayat kini ug wala maigo sa maong pagpamusil ug ang bala didto miigo sa float.

Base sa taho sa DySS nga gibubo-an og gasolina sa wala mailhing tawo ang float ug aduna kini lungag sa bala.

Base usab sa taho nga si Richard Buscayno, presidente sa  Akrho Visayas Chapter mipasalig nga dili mangita og away ang iyang mga sakop o magbuhat og binuang nga maoy makapainit sa lain nga grupo.

Si Buscayno base usab sa taho sa DySS mibutyag nga gilimitahan  ang  mga tawo nga gipasakay sa ilang float nga dili moubos sa 20 ka  tawo  aron usab sa paglikay sa kagubot sukwahi sa milabay'ng tuig nga daghan kaayo ang gipasakay.

Ang Banat News mitawag kang Buscayno aron makuhaan kini og pamahayag kabahin sa nahisgutang hitabo apan dili ma-contact ang cellphone niini.