Polis nga “hubog” gisuspenso 10 adlaw

Gisuspenso dayon og 10 ka adlaw ang usa ka polis nga mi-duty nga hubog niadtong bisperas sa Bag-ong Tuig ug usa sa mga nasakpan atol sa surprise inspection ni Vice Mayor Michael Rama.

Apan sumala pa ni Inspector Richard Diaz sa Waterfront Police Station (WPS) nga hubog nang daan gikan sa ilang balay si SPO1 Rene Cerna niadtong nag-inspection si Rama sa ilang buhatan pasado alas 10:00 sa gabii niadtong Martes.

Gani gikuyogan siya sa iyang asawa sa pag-report ang maong polis ug walay naabtan ang bise mayor nga nag-inom ug natulog sa ilang buhatan.

Ang pagkasuspenso kang Cerna maoy resulta sa lakang ni Sr. Supt. Patrocinio Comendador, hepe sa Cebu City Police Office pagtuman sa mando ni Rama nga ipadesiplina ang mga kapolisan nga naghubog ug natulog sa oras sa tingtrabaho.

Sumala pa ni Rama nga ang tanang 11 ka  mga estasyonan sa kapolisan iya gyung giduaw niadtong Martes gikan sa alas 5:00 sa hapon hangtod alas 10:00 nga wa magpahibawo sa mga hepe niini.

Diha nadiskubrehan sa bise mayor ang kahugaw, baho ug nasakpang mga polis.

Hinuon sa  Mabolo Police Station, kahugaw ray naabtan sa bise mayor apan way hubog ug nakatulog nga polis didto, sumala pa ni Supt. Armando Radoc, hepe sa maong buhatan.