Gikatahapang kawatan nga napusilan sa barangay Sayaw sa lungsod sa Barili nga misibat sakay sa mini bus apan nadakpan pag-usab sa kapolisan sa lungsod sa San Fernando nakasibat pag-usab samtang nagpatambal sa Vicente Sotto Memorial Medical Center sa dakbayan sa Sugbu.
Si SPO3 Joseph Yongco nga maoy imbestigador sa kapolisan sa lungsod sa San Fernando nga gihinabi sa Banat News miingon nga sila si PO1 Estuart Bayang ug PO1 Alin Bandolon maoy nakadakop sa suspetsado.
Ang nadakpan mao si Florencio Cinco, nga taga barangay Sayaw sa lungsod sa Barili kinsa napusilan sa likod ug milapos sa tiyan.
Dali unta nga nakasakay og mini bus nga pasaheroan ang suspetsado apan nadakpan kini sa kapolisan sa San Fernando nga nag-atang daan human makadawat og alarma.
Gikumpimar ni PO2 Wiliam Beltran sa Barili Police Station nga dunay pagpangawat nga nahitabo diha sa barangay Sayaw.
Apan ang gikawatan og manok gituohang gikuyawan kay nakapusil sa suspek ug wala mopakita sa ilang buhatan.
Samtang gibantayan nila ni PO1 Bayang ug PO1 Bandolon ang suspetsado diha sa ward sa Vicente Sotto Memorial Medical Center kalit nga miikyas ang suspek ug wala na igkita.