Nilayat sa barko tipi

Usa ka tripulante sa barko ang nalumos human miambak sa dagat gikan sa barkong iyang gitrabahoan tungod lang sa iyang bola nga nahagbong diha sa dagat samtang siya nagduwa niini niadtong milabay’ng Huwebes sa buntag.

Patay nang naabot sa Cebu City Medical Center ang biktimang si Allan Navarres, 27, tigbantay sa barkong MV Filipinas-Maasin ug lumad nga taga Polomolok, South Cotabato.

Sumala pa sa kaubang tripulante ni Navarres nga si Ramil Apio, 21, nagduwa ang biktima sa maong bola diha sa dulong sa barko apan niuntol kini ug nalagpot ngadto sa dagat.

Gikatahong wala nila damhang kalit nga miambak ang biktima ngadto sa dagat gikan sa iyang gibarugan ug nitibugsok sa tubig apan dangtan pila ka gutlo diha nalang nila masayring nalumos na kini.

Wala usab matino kung kahibalo molangoy ang biktima o ba kaha kung unsay hinungdan nga wala kini makalangoy pasaka sa tukmang oras nga nakaingon sa iyang hinanaling kamatayon.

Sumala pang Petty Officer 3 Arnulfo Hisuntora sa Coast Guard Station Cebu operations division sa pakighinabi sa Banat News kagahapon base sa report nga ilang nadawat nagduwa og basketball ang biktima uban sa mga kaubang tripulante niini dihang nahagbong kini.

Nasuta usab nga kusog kaayo ang sulog sa dagat ug gibana-banang 200 ka metros ang iyang gianuran gikan sa barkong iyang gikahagbungan ug ang fastcraft nga MV Weesam mao nay nakabangal sa iyang lawas ug kini gihaw-as gikan sa dagat.

Ang biktima gitabang sa mga kaubanan ug gidala sa   tambalanan apan gideklarar kining dead on arrival.

Walay nakitang foul play ang grupo ni SPO4 Alex Dacuam sa Homicide Section sa patay’ng lawas sa biktima nga makapadudang dunay mipanamastamas kaniya. (Uban sa report ni Julie Christy Barredo, USJR)