Abogadong nanugo panuborno imbestigahon

Giduso sa kanhi presidente sa IBP-Cebu City Chapter Atty. Democrito Barcenas nga ipa-imbestigar  sa mga sakop sa IBP  ang abogadong gilambigit ni PO1 Blaire Quezon nga maoy nisugo kaniya sa pagsuborno og 50 mil pesos bugti sa pagpaubos sa kasong illegal drugs sa kliyente niini.

Una niini si PO1 Quezon nadakpan sa entrapment sa kapulisan niadtong Biyernes didto sa dakbayan sa Talisay human maoy ni-negotiate sa pagpa-lower lang sa kaso ni Cleofe Racaza.

Si Atty. Barcenas nagkanayon nga ipaagi gyud nila og insaktong proseso  ang imbestigasyon kini aron makatubag sa mga pasangil.

“Para nako imbestigahon gyud ni siya ug kun mamatud-an ilang i-endosar sa IBP national office aron kini nalang usab ang moduso sa kaso ngadto sa Korte Suprema.

Gipasabot niini nga makaayo nga dunay imbestigasyon sa ingon kun wala man ganiy sala di “ma-vindicated siya” gumikan kay usa kini ka unethical  nga practice sa usa ka abogado.

Iyang gipadayag nga iyang paninguhaon isip sakop sa IBP board nga  matuki ang maong isyu sa wala pay Pasko nga dili maabtan og bakasyon.

Hinuon iyang gitataw nga mamahimong mopahigayon silag imbestigasyon nga moto-propio bisan walay pormal nga complaint labot niini.