Gipaniguro ni Mayor Tomas Osmeña nga dili mulampos dinhi sa siyudad sa Sugbu ang bisan unsang transport strike nga pagahimuon.
Kini taliwa sa bahad sa nagkadaiyang transport group lukop nasod nga ilang iparalisar ang transportasyon sa tibuok kapupud-an karong adlawa.
Kini tungod usab sa ilang kadismaya sa gobiyerno mugna sa walay hunong ug nagpadayong pagsaka sa presyo sa mga produktong petrolyo.
Nasayran hinoon sa Banat News nga dili mosalmot sa nationwide transport strike karong adlawa ang mga transport group dinhi sa Sugbu.
Apan matod ni Mayor Osmeña nga basi sa nangaging mga transport strike, dili mulampos dinhi sa siyudad ang bisan unsang welga sa mga jeep de pasaheroan.
“I have a strong track record and that’s very hard for a strike to be successful here in Cebu City,” nagkanayon ang mayor.
Kini tungod usab sa mga pagpangandam nga gihimo sa dakbayan nga naglakip na gani sa pagpanghatag og pack lunch ngadto sa mga non-striking driver.
Ang secretary general sa Nadsu nga si Ruben Rama nitataw hinoon nga mubalik ra pagpamasahero ang ilang mga sakop, human sa ilang pagahimoon nga lihok-protesta.
Padayong gidemanda sa Nadsu ug sa kaalyado niining mga grupo, ang pagbasura sa Oil Deregulation Law nga maoy ilang gituuhan nga hinungdan sa walay hunong nga oil price hikes.
Nibahad ang Nadsu paglusad og kaugalingong transport strike sunod buwan, kung walay makitang kalambuan sa ilang himoon nga kalihukan karong adlawa.
Agig pagtapos sa ilang people’s protest miingon si Rama nga sila muhapit sa Department of Energy kon DOE-7 aron itunol ang ilang position paper.