Usa ka gidudahang sakop sa Alpha Kappa Rho fraternity ang gipusil patay diha sa West Poblacion dakbayan sa Naga niadtong milabay'ng gabii.
Ang biktima giila nga si Jay Paner, 23, residente sa South Poblacion sa nahisgutang lugar, samtang ang gitumbok nga mipusil kaniya giilang si Renante Caballes, residente ra usab sa nahisgutang lugar.
Sumala pa sa report sa ABS-CBN kagahapon, sakop ra usab nga fraternity ang maong suspetsado ug ang biktima apan ang kapolisan wala mokumpirmar niini tungod kay ila pang susihon ang maong report.
Matud pa ni SPO1 Beinvenido delos Santos sa pakighinabi sa Banat News nagsakay og motorsiklo ang biktima nianang tungura ug giatangan sa suspek ang agianan niini.
Pag-abot diha sa duol gikatahong gipusil sa suspek ang biktima diha sa iyang dughan ug sa agtang nga maoy hinungdan sa hinanali niining kamatayon.