7 ka bata wala maduso sa city hall

Wala pa gyud ma-turn-over ngadto sa kagamhanan sa dakbayan sa Sugbu ang pito ka mga minor de edad diha sa Operation Second Chance.

Kini taliwala sa release order nga giluwatan sa korte alang sa pagbalhin sa nahisgutang mga minor de edad ngadto na sa laing pasilidad.

Ang pito ka mga batan-on nga ibalhin mao kadtong mieskapo ug nahibalik diha sa Operation Second Chance pipila ka semana na ang nakalabay.

Matud sa warden sa nahisgutang pasilidad nga si Inspector Merlina Metante nga ilang gipabalik ang release order tungod kay dunay sayop ang case number sa duha ka batan-on.

Gitataw ni Metante nga dili nila pugngan ang nahisgutang mga minor de edad kun mahibalik na diha sa sentro ang release order ug makurihian.

Gitinguha sa kagamhanan sa dakbayan nga mabalhin og laing sentro ang maong mga batan-on aron dili kini magduha-duha pagluwat og affidavit.

Una nang gibutyag sa nahisgutang mga minor de edad nga ang pagmaltrato kanila sa mga guwardiya maoy usa sa mga hinungdan nga sila mieskapo sa sentro.

Kini sama sa paghapak og tubo sa ilang lapa-lapa ilabi na sa higayon nga makahimo og kasaypanan sulod sa maong pasilidad.

Buot kuhaan ni Konsehal Gerardo Carillo og affidavit ang mireklamo nga mga batan-on alang sa pagpasaka og tukmang kaso batok sa mga guwardiya.

Labing minos tulo ka mga guwardiya diha sa nahisgutang sentro ang gireklamo sa mga minor de edad nga mimaltrato kanila.

Apan miingon ang konsehal nga nagmakuli pagluwat og pinanumpaang pamahayag ang mga minor de edad samtang anaa pa sa Operation Second Chance tungod sa ilang kahadlok.

Si  Carillo mihatag lang og tagal kutob karong semanaha sa mga nagdumala sa Operation Second Chance  pag-release sa pito ka minor de edad.