3 ka informant vs Aves magbahin sa P300 mil ganti

Tulo ka mga informant nga maoy responsable sa pagkasikop sa gunman sa Alpha Kappa Rho (Akrho)  ug suspek sa nahitabong drive-by shooting dinhi sa dakbayan sa Sugbu ang magbahin sa P300 mil   nga gitanyag nga ganti sa kagamhanan sa dakbayan sa Sugbu.

Gipahibalo kini ni Konsehal Augustus   Pe  Jr.   human iyang gibutyag nga sila gyud mismo si  Mayor Tomas Osmeña ang nakigkita ug nakighinabi sa nahisgutang mga informant. Si Osmeña mibutyag nga supporter sa Bando Osmeña Pundok Kauswagan, ang usa sa mga informant.

Gibutyag ni Pe nga gumikan sa  "A1 infomartion" nga gihatag sa mga informer nagmalampuson sila pagmonitor sa mga kalihukan ug lakaw ni Aves hinungdan nga nasikop gyud kini sa kapolisan samtang  paingon mosakay sa barko paingon sa Leyte niadtong  miaging gabii.

Apan gibutyag sa konsehal nga moagi pa kini sa hustong mga proseso una pa mapagawas ang maong ganti ngadto sa mga informer.

Lakip sa nakuha gikan sa posisyon ni Aves mao ang usa ka kalibre .45 nga armas ingon man gidiling drugas.