33-anyos milayat gikan sa 3rd floor sa boarding house

Usa ka 33-anyos nga lalaki ang milayat gikan sa atop sa third floor sa usa ka boarding house sa dalan Tupas sa barangay Sawang Calero kagahapon sa hapon kinsa gituohang dunay dakong problema sa iyang asawa ug gidudahan usab nga nakagamit og ilegal nga drugas .

Ang maong tawo mao si George de Letran, 33, residente sa nahisgutang barangay kinsa sugod pa nianang pagka alauna sa hapon nikatkat sa panimalay sa ilang silingang giila lang sa pangalan nga Marivic.

Gikan didto nagtapon-tapon  kini sa mga atop sa mga balay hinungdan nga naalarma ang kapolisan hangtud nga nikatkat kini diha sa maong boarding house nga gipanag-iya sa pamilyang Salazar.

Si De Letran gisuwayan og kumbinsir sa mga polis ug sa kabomberohan pagkanaog diin ang uban misaka pa sa aereal ladder sa Bureau of Fire Protection ug ang ubang mga polis diha sa atop sa JSV Building nga sikbit sa maong boarding house.

Si Supt. Mariano Batiancela ang hepe sa San Nicolas Police Station ug maoy ground commander sa hitabo sa pakighinabi sa Banat News nga ilang gihimo ang tanan aron mapugngan ang pag-ambak sa biktima apan gumikan kay walay presensya sa mga kabanay niini naglisod sila sa ilang tinguha.

Nakadugang pa niini ang kakulangon sa gamit sa BFP nga walay kahimanan aron mosalo kun “tarpauline” sa moambak sa mga tag-as nga building dugangan pa usab ang pagpunay og bugal-bugal sa ubang mga tawo diha nga nagpunsisok nga miawhag pa kaniya pag-ambak.

Kun mag-ukon-ukon kini ilang bugal-bugalan pag-usab pagsinggit og “ambak na! Pangilad man na imo!” sugod 1:50 diha na sa maong atop si de Letran ug misaad kini nga molayat inig tunob sa alas 3 apan pagkaalas 2:50 milayat na kini padulong sa mga tawo diha sa ubos.

Dunay usa ka tawong misuway og salo kaniya apan ang kadaghanan nag-iya og padaplin hinungdan sa pagkahagsa niini una ang duha ka tiil sa kongkretong dalan hinungdan sa pagkapusa sa iyang tuong tiil ug gituuhang kritikal ang kahimtang niini gumikan sa pagsugpa niini og dugo.

Si Geralinda Cabasan, ig-agaw sa kapuyo ni de Letran dihang gihinabi sa Banat News mitug-an nga napulo palang ka adlaw dihang nabalik dinhi gikan sa Ozamis ang biktima.

Sumala pa niini nga nagkuyog si de Letran ug kapuyo niini nga si Reysie Garcia sa Ozamis apan nag-inusara nalang nga nabalik si de Letran dinhi ug kanunay na kining wala sa iyang kaugalingon.

Matud pang Cabasan dunay hypertension ug nervous breakdown si De Letran.

Si FO3 Nelson Codilla ang operator sa fire ladder sa BFP miangkon sa Banat News nga wala silay kahimanan aron magamit sa susamang mga insidente.

Si Batiancela nagkanayon nga mohimo pa sila og background check sa pagkatawo ni De Letran ug sa kung unsay nakaingon sa pag-ambak niini, ug kini miangkon nga kulang ang gidaghanon sa mga polis aron makontrol ang mga tawong naghugop og tapok diha sa tiilan sa maong building.