Gitinguha ni Cebu City Councilor Edgardo Labella nga mahimo nang institusyon ang pagbutang og health warning diha sa label sa mga pakete sa mga sigarilyo.
Ang gusto sa konsehal nga picture-based nga pasidaan ang ibutang sa mga pakete sa sigarilyo aron mas epektibo ang kampanya sa gobiyerno batok sa panabako.
Si Labella moawhag sa Kongreso pinaagi sa iyang ipalabang nga resolusyon nga mopanday og balaudnon nga magpugos niini sa mga local cigarette companies.
Ang Akta Republika 9211 kon ang Tobacco Regulation Act nagmando sa pagbutang og text-based health warning sa pakete sa matag sigarilyo.
Apan matud ni Labella nga ang maong matang sa pasidaan wala makahatag og kausaban sa nagkadaghan na hinoong manabako ilabina sa kabatan-unan.
Nasayran nga ang mga kompanya sa sigarilyo sa nasud naghimo na og picture-based warning diha sa mga pakete sa ilang mga produkto.
Apan kini giingong didto sa gawas gibaligya tungod kay kini maoy usa ka rekisito sa ubang kanasuran sama sa Thailand.
Ang Akta Republika 9211 wala magmando og picture-based warning hinungdan nga wala usab kini himoa sa mga kompanya sa sigarilyo dinhi sa nasud.
Nagkanayon si Labella nga kung nahimo na kini sa mga cigarette company sa ilang ibaligya ngadto sa gawas, walay rason nga dili kini nila mahimo dinhi sa Pilipinas.
Nagtuo ang konsehal nga ang pagbutang og hulagway sa pakete sa sigarilyo sa dautang epekto sa panabako maoy epektibong paagi pagbadlong sa mga hinabako.
Gawas niini miingon si Labella nga ang picture-based warning mao usab ang maayong pang-alkontra sa mga cigarette commercials.
Ang nagkadaiyang pagtoon nagpakita nga moabot sa 70 porsiyento sa mga tigtabako ang dugay nang gusto nga moundang sa panigarilyo apan giingong naglisod sa paghunong.
Sumala pa ni Labella nga ang pagpakita sa makalilisang nga hulagway sa epekto sa panabako diha sa pakete sa sigarilyo dako og ikatabang pagpahunong sa mga hinabako.