Magtiayong tigulang sakay sa Ave Maria 5 ilhan na

Nailhan na ang magtiayong tigulang nga namatay atol sa nahitabong pagkalunod sa motorbanca nga M/V Ave Maria-5 didto sa kadagatan sa Hininsula point sa isla sa Camotes niadtong Martes sa hapon.

Gibutyag ni Chief Petty Officer ug Assistant Commander sa Cebu Coast Guard Roberto Muela  nga ang magtiayong tigulang nga namatay naila nga sila si Magdaleno Maranan, 80 ug asawa niining si Victoria, 85, molupyo sa Poro, Camotes.

Matud ni Muela nga posibleng giatake sa sakit sa kasingkasing ang  magtiayon sa dihang paingon nang nalunod ang gisakyan niining motorbanca nga maoy gituohang hinungdan sa ilang kamatayon.

Ang M/V Ave Maria-5 dunay mokapin sa 100 ka mga pasahero walay labot ang mga crew niini matud sa kapitan niini nga si Riel Florentino sa dihang gipangutana sa usa sa mga pasahero nga si Gilia Lacbayo.Apan nasayran gikan kang Muela nga mokabat lang sa 43 ka pasahero ang nabutang sa manifesto niini.

Ang barko sa Philippine Navy  maoy naka-rescue sa patay’ng lawas ni Victoria samtang ang M/V Melrivic maoy gisakyan sa patay’ng  lawas ni Magdaleno kauban ang 20 pa ka mga survivors.

Gibutyag usab ni Muela nga nakit-an didto sa Caubean island nga gipadpad ang nalunod nga motorbanca kagahapon sa alas 9:25 sa buntag.

Samtang sa paghimo ning balita padayon pang gipahigayon ang search and rescue operation sa duha ka nahabiling missing nga pasahero nga naila sa pangalan nga sila si Catalino Detob, 78, usa ka Lito Maranan, 53.

Matud ni Muela gipaabot pa karon nila nga makaduso sa marine protest ang kapitan sa nalunod nga motorbanca nga maoy basehan alang sa pagsugod sa pormal nga imbestigasyon pagtumbok sa hinungdan sa maong panghitabo.

Apan matud ni Muela sa inisyal nilang imbestigasiyon nasuta nga ang pagkabuslot sa luwang niini tungod sa kusog nga bawod mugna sa kusog nga hangin maoy nakaingon nga napawong ang makina ug nasudlan og tubig ang maong banka hinungdan nga nalunod alas 4:30 sa hapon 30 minutos sa dili pa ang schedule nga arrival niini sa pantalan sa Poro, Camotes.

Gihimakak usab ni Muela ang mga pasangil nga dugay silang nakaresponde tungod kay matud niya alas 4:15 nila nadawat ang report ug sulod sa 15 minutos giparesponde dayon nila ang ilang coast guard vessel  nga M/V Melrivic ug gisundan pa kini sa navy vessel paglabay sa laing 15 minutos.