Gipahimangnoan karon sa Cebu City Hall Cash Division ang mga prinsipal ug mga supervisor sa mga tunghaan sa dakbayan nga mag-andam na usab og bag-ong payroll.
Kini alang unya sa laing usa ka libo ka pesos nga ihatag ngadto sa mga magtutudlo nga miserbisyo sa niaging barangay ug SK elections.
Kini human usab ipahibawo ni Presidente Gloria Macapagal Arroyo nga iyang dugangan og usa ka libo ka pesos ang honorarium sa mga magtutudlo.
Nahimuot ang presidente sa resulta sa miaging piniliay tungod sa giingong pagkamalinawon ug sa pagkamalampuson niini.
Matud sa labaw sa cash division nga si Emma Compra, mas maayong i-andam daan ang payroll aron ma-release dayon ang kuwarta sa higayon nga ila na kining madawat.
“Mohimo gyod sila og laing payroll kay ang payroll man gud nga ilang gi-submit karon for P1,500 ra man unya ato naman nang na-disburse,” sumala pa ni Compra.
Giangkon ni Compra nga magdobli na ang ilang trabaho sa paghatag og dugang honorarium sa presidente ngadto sa mga magtutudlo.
Gipadayag hinuon ni Compra nga kung kini ikalipay sa tanan ilabina sa mga magtutudlo, andam gihapon silang muhimo sa trabaho nga isangon kanila.
Nasayran sa Banat News nga bisan og gihangop sa mga magtutudlo ang pahibawo sa presidente, dunay pipila kanila nga nagduha-duha nang muserbisyo sa musunod nga eleksyon.
Alang sa maong mga magtutudlo, gawas nga dili sila mahasol pagpaabot ug pagkuha sa ilang honorarium, malikay usab sila sa kiha ug pagpanghasi sa mga kandidato.
Una na hinuong gipadayag ni Konsehal Edgardo Labella nga ang mga magtutudlo dili makabalibad pagserbisyo sa bisan unsang eleksyon.
Kini tungod kay giingong dunay balaud nga nagmando kanila nga maoy mo-administer sa piniliay ma-lokal man o nasyonal.
Ang konsehal usa usab sa mihangop sa lakang ni Presidente Arroyo, pagdugang sa honorarium sa mga magtutudlo nga niserbisyo sa nakalabay nga piniliay.
Kun mahinumduman, si Labella maoy usa sa misaway sa hingtungdang ahensya sa wala pagtuman niini sa gisaad nga honorarium ngadto sa mga magtutudlo.