Nadawat na sa Cebu City Hall ang kapin sa P11 milyones nga tseke alang sa mga sakop sa Board of Election Tellers (BET) nga niserbisyo sa niaging piniliay.
Apan giklaro sa labaw sa cash division sa City Hall nga si Emma Compra, nga ang maong kantidad wa maglakip sa add on alang niadtong BET nga naghupot og presinto sa SK.
Gitataw ni Compra nga P1,500 lang ang madawat sa matag sakop sa BET ug dugang P500 alang niadtong naglangkob sa Barangay Board of Canvassers kon BBOC.
Subay niini girekomendar ni Compra ngadto sa Cebu City Comelec Office nga ang mga principal na o ang supervisor sa matag tunghaan maoy muhikay sa payroll.
“Kay during man gud sa election, duna may mga miyembro sa BET nga wa makatunga, unya ang chairman man sa BET maoy gitahasan pagtudlo og ihulip, so maingon nato nga sila maoy nakahibalo kung kinsa ang angayang hatagan sa honorarium mao nga sila ang mo-certify ana,” sumala pa ni Compra.
Gipadayag ni Compra nga ang labing sayo nga payroll nga ilang madawat, mao usab ang una nilang mahatagan sa honorarium.
Apan niingon si Compra nga ang payroll gikinahanglan una nga iagi sa Comelec alang sa verification ug certification niini.