Paglabay'g granada may kalambigitan sa politika

Dako ang pagtuo ni outgoing Inayagan barangay kapitan Narciso Tablate ang paglabay og granada sa barangay hall sa Inayagan sa miaging semana 100 porsiyento nga politika ang nagpaluyong motibo niini.

Kini maoy pamahayag ni Tablate sa mga tigbalita dihang nibisita sa buhatan ni Cebu Provincial Police Office Director Sr. Supt Carmelo Valmoria kagahapon sa buntag diha sa Sudlon.

Si Tablate napupos na iyang tulo ka termino pagka kapitan hinungdan nga nidagan nalang siya pagka konsehal sa Inayagan ug nidaog sa milabay'ng eleksyon sa Oktubre 29.

Matud ni Tablate mismo siya ug iyang mga kaubanan gikonsiderar nga suspek hangtud nga wala pay resulta sa imbestigasyon apan hinuon duna siyay gidudahang maoy responsable niini apan dili pa niya ikabutyag sa pagka karun tungod kay nagpadayon pa man ang gihimong imbestigasyon sa mga otoridad.

Matud niya nga duna gyuy politiko nga dili makadawat sa kapildihan  ug himuon na hinuong personal tungod kay nipagawas man og daghang kuwarta atol sa eleksyon aron lang makadaog.

Kahinumduman sa miaging Miyerkules sa kaadlawon sa milabay'ng semana duha ka motorsiklo dunay sakay mga wala mailhing tawo ang nilabay og hand grenade atubangan nga bahin sa barangay hall sa Inayagan.