Nibaligya'g Ecstasy nadakpan

Usa ka giingong disc jockey sa usa ka sikat nga diskohan diha sa Crossroads sa Banilad ang nadakpan sa kapolisan atol sa gihimong buy-bust operation kagahapon sa kaadlawon.

Ang suspek   gipresentar ngadto sa media sa commander sa City Anti-Illegal Drug Special Operations Task Force (CAIDSOTF),  Supt. Pablo Labra III ug hepe sa Criminal Investigation and Intelligence Branch,Sr.Insp. George Ylanan.

Giila ang dinakpan mao si Mon Angelo Congmon,22, nga mas naila sa pangalan nga “DJ Mon”, residente sa dalan Lomboy sa Banawa,Guadalupe, ug nakuhaan kini og 48 ka mga pildoras sa “ecstasy.”

Ang “ecstasy” gihulagway sa kapolisan nga usa ka “high-end drug” sanglit kadto rang mga adunahan maoy makapalit niini tungod kay nagkantidad kini og tag P1,000 matag usa.

Sumala pang Ylanan dugay na nilang gipanid-an si Congmon sa operasyon niini, base sa impormasyong ilang nadawat magduha na ka tuig kining nalambigit niini apan mihimakak ang suspek sa pasangil.

Matud pang Ylanan talagsaon ra kaayong dunay madakpang tigpayuhot niini tungod sa kamahal.

“Actually sa pagkakaron isolated man kaayo ang mga ingon ani nga dakop kay panagsa ra kaayo kay dili man siya affordable ug dili sad readily available sa tanang areas, dili ni siya pangmasa ba,” asoy pang Ylanan.

Usa ka polis sa CIIB kinsa nagsuot og “in” nga pananina sa mga batan-on maoy nipalit og usa ka pildora nga “ecstasy” kang Congmon ginamit ang duha ka tag P500 nga kwartang marked money diha sa parking lot sa maong diskohan.

Human matunol ang tableta, diha-diha gisikop si Congmon sa kapolisan, nakuha diha sa iyang posesyon ang 15 pa ka “ecstacy” ug laing 32 ka “ecstasy” sa iyang sakyanan.

Niadtong Oktubre 6, human matinong si Congmon ang tigpayuhot niini misuway og palit isip “test buy” ang CIIB ug ang napalit nga pildora gipailawom sa eksaminasyon sa PNP Crime Laboratory nga mitumaw nga usa ka matang sa illegal nga drugas.

Si Congmon atubangan sa media miinsister nga dili makadaot ang maong pildoras ug miingon nga bisan susihon pa kini sa internet, kini dihang si Labra namahayag sa media nga ang “ecstasy” usa ka matang sa gidiling drugas tungod sa kemikal niining susama sa makita sa shabu.

Apan si Ylanan ug Labra mipakita sa libro sa Primer Dangerous Drugs Act RA 9165 diin gilatid nga ang “ecstasy” usa ka matang sa drugas nga dunay kemikal nga komposisyong methylenedioxymethamphetamine kun MDMA.

Si Congmon midumili na hinuon pagtug-an kung si kinsa ang iyang supplier sa maong drugas ug kung si kinsa ang  iyang mga kustomer.