Kap Andales gisaway sa kaatbang

Si kanhi Kapitan Rico Salma sa barangay Pahina Central mi-akusar kang kapitan Sesenio  Andales nga walay nahimo sa iyang termino sa pagka kapitan kun dili pulos lang beautification ingon man pangurakot sa katungdanan.

Si Salma nga nahinabi sa Banat News miingon nga si Andales daghang mga anomalusong transaction diha sa barangay usa na niini mao nga iyang gi-ukay nga anomaliya nga pag-railroad sa pag-aprobar og usa ka Cell Site sa Sun Cellular nga naa diha sa ibabaw nga bahin sa Uniword Building diha sa may dalan Boromeo diin basi sa iyang tinubdang kasayuran nakadawat ang kapitan og 30 mil pesos sa maong transaction.

Matud pa niini nga ang kapitan nipadali-dalig aprobar sa konseho labot ning maong isyu pinaagi sa wala pagpatuman sa usa ka public hearing diin gikasagmuyo kaayo sa katawhan sa maong dapit gumikan kay ang maong cell site hulga sa panglawas sa kabataan nga makakuha’g nagkadaiyang sakit sama sa kidney ug uban pang balati-an nga makuha sa radiation.

Gawas pa niini iyang gipahibalo nga adunay mga isyu karong nitumaw nga matud pa iyang gihatagan og pagtagad kini gikatahong 20 mil pesos matag semana nga madawat sa kapitan ug ubang opisyal sa barangay labot na sa koleksyon sa kita sa video karera.

Gibutyag niini nga ang kapitan migamit usab nga personal sa trapal sa barangay nga gihatag  ni kanhi kongresista Joy Young pinaagi sa pagbutang niini sa roof top sa panimalay ug karon bag-o ra gitangtang  human nahibaloan sa ilang mga residente nga para man unta kini sa barangay.

Dugang niini nga pipila na ka mga negosyanteng Insek diha sa ilang barangay ang nipadayag ngadto kanila nga nasagmuyo sa kapitan ug nagpangutana kun kapila man diay kini mag- birthday sa usa ka tuig nga magpunay nalang kinig solicit og letsong baboy.

Nunot niini iyang giawhag si Andales nga mopakitag husay sa publiko sa kita sa ilang barangay ingon man mga proyektong napatuman niining vesible sa katawhan kini tungod kay hangtud ning panahuna pulos lang beautification ug ang iyang mga proyekto maoy gisunod.

Hinungdan sa maong kapakyas sa pag-deliver sa kapitan sa mga basic services iyang gitubag ang awhag sa katawhan sa ilang barangay nga maoy mosakbang kang Andales aron maputol na ang walay maaayong serbisyo niini.

Masaligon siya nga sila maoy molusot karong piniliay human usab naghiusa na karon ang ilang grupo ni konsehal Vicente “Inteng” Madarang nga maoy nitug-an sa mga anomaliya sa kapitan.

Samtang sa iyang bahin sa kapitan Andales nga nahinabi sa Banat News mihagit nilang Salma ug Madarang nga dili magsige tabi kun dili ilang ipamatuod pinaagi sa pagdusog dokumento labot sa mga pamasangil batok kaniya nga tataw nga political blackmail.

Sumala pa ni Andales walay factual and legal basis ang mga akusasyon nga gibato kaniya labi na gayud sa klaseng pagkatawo ni Salma ug Madarang nga kadudahan ang motibo nga karon pa nireklamo panahon sa election.

Giklaro niini nga si Madarang mismo apil og pirma sa pag-aprobar sa cell site ug dili usab mahitabo nga walay public hearing kini tungod kay duna siya’y mga rekords nga makapamatuod niini.

Iyang gibutyag nga wala makit-i ni Salma ug Madarang ang ilang barangay council nga nihangyo sa mayor nga dili pasirhan ang CCMC,  ang iyang pagpaayo sa buslutong atop sa sports complex  nga gubaon kaayo niadto, ingon man renovation sa barangay hall nga wala buhata sa panahon ni Salma ug Madarang.

Gani iyang ipaniguro nga 7-0 usab unya ang resulta sa election ug mamombon gyud ang ilang kaatbang sa barangay.

Samtang ang kabahin sa SK Chairman diin ang iyang anak maoy nidagan dili usab kini usa ka political dynasty kini tungod kay ang katawhan ug mga batan-on maoy mopili niini.