Si Gobernador Gwendolyn Garcia walay kalibutan sa gikagubtang isyu bahin sa giingong panghatag sa Malacañang og sobre nga dunay sulod nga salapi ngadto sa mga kongresista, gobernador ug mayor sa miaging semana.
Giangkon sa gobernador nga mitambong siya sa emergency meeting nga gipatawag sa Malacañang niadtong Huwebes, Oktubre ll apan birthday cake ug kandila lang ang iyang nadawat.
Base sa taho nga ang mga mitambong sa meeting ang nakadawat og P500,000, ug P200,000..
Matud ni Garcia nga kun nakadawat pa siya dili siya magpanuko sa pagtug-an sa publiko ilabi na kun ang maong salapi alang sa mga proyekto sa gobiyerno nga makaayo sa katawhan sa lalawigan sa Sugbu.
Apan matud sa gobernador nga nagdali siya pagpauli nganhi sa Sugbu niadtong higayona human sa ilang meeting tungod kay nangandam siya alang sa iyang birthday nianang pagka Biyernes Oktubre 12.
Gawas sa iyang birthday, gikapoy usab siya sa iyang biyahe ngadto sa France sukad niadtong Oktubre 3 ug nauli siya sa Cebu nianang pagka Oktubre 10 na ug milarga usab ngadto sa Manila pagka-Oktubre 11.
Gitataw ni Garcia nga kabahin sa pagpalambo sa mga proyekto sa mga lungsod, siyudad ug lalawigan ang gihisgutan sa meeting.