Roderos, bag-ong RD sa PRO-7

Pormal nang gibutang isip bag-ong regional director sa Police Regional Office –7 si Chief Supt. Ronald Roderos hulip kang Chief Supt. Silverio Alarcio,Jr. kinsa ibalhin na isip bag-ong director sa Camp Crame.

Si Roderos kinsa maoy girekomendar sa kadaghanan sa mga gobernador sa Central Visayas maoy inilog kumparar sa girekomendar ni Mayor Tomas Osmeña nga si Chief Supt. Ireno Bacolod nga usa ka Sugbuanon.

Mismong ang pangulo sa Regional Peace and Order Council nga si Gov. Gwendolyn Garcia maoy dayag kaayong mipahibalong si Roderos maoy iyang buot nga mamahimong director sa PRO-7.

Unang migawas nga sayop nga balita mao ang giingong kadaghanan sa mga gobernador sa rehiyon gustong si Bacolod ang ilang mamahimong director sa PRO-7.

Si Roderos pito na ka tuig nga nagserbisyo dinhi sa Sugbu lakip na ang pagkahimo niining director sa Cebu City Police Office, ang labing ulahing posisyong iyang gihuptan mao ang pagka deputy director for administration (DRDA) sa PRO-7.

Si Roderos maoy nahimong opisyal nga tigpamaba sa PRO-7 atol sa pagpahigayon sa 12th Asean Summit sayo ning tuiga.

Si Alarcio, bisan wala pa ang pormal nga order gikan sa Crame mipasumbingay nang daan nga si Roderos maoy mohulip kaniya, gani mianunsyo na kining daan si Roderos maoy haom sa maong pwesto nunot sa iyang eksperiyensya dinhi sa rehiyon.

Samtang si CCPO director, Sr.Supt. Patrocinio Comendador mihulagway kang Roderos nga usa ka maayong “manager” tungod kay ang mga mando niini moresulta gyud og kaayuhan samtang si Alarcio usa ka maayong “lider” tungod kay mao gyud kini mangunay sa gimbuhaton.

Matud pang Comendador nga ilang suportahan si bisan kinsa pa maoy mabutang sa PRO-7 lakip na pagsunod sa mga kamandoan ug programa niini.