Resolusyon sa Liga ng mga Barangay pagsibog sa SK ug Barangay polls gisaway

Gisaway ni Cebu City ABC president Eugenio “Jingjing” Faelnar ang nakab-ot nga resolusyon sa Liga ng mga Barangay nga nag-awhag sa Senado nga mosuporta sa proposal alang sa pag-uswag sa gitakdang Barangay ug SK elections sunod buwan.

Kini tungod sa giingong nitumaw nga mga sirkumstansya, nga maoy maghimong impractical sa pagpahigayon sa Oktubre 29 nga eleksyon.

Pipila sa gitumbok sa   liga mao ang wala pa maresulbar nga mga issue sama sa poll automation, kakuwang sa pundo ug uban pa.

Subay niini giawhag sa Liga si Senador Richard Gordon nga maoy modala sa ilang tingog ngadto sa Senado.

Apan alang kang Faelnar, ang gihimo sa ilang nasudnong Liga maghatag lang og kalibog sa ubang magpapili sa umaabot nga Barangay ug SK elections.

Gitataw sa ABC president nga dili na malilong ang sayong pagpangampanya nga gihimo sa ubang mga incumbent barangay officials.

Gani naobserbahan ni Faelnar dinhi sa siyudad sa Sugbu, nga nagka-init na ang ubang mga pundok sa pipila ka mga barangay.

Tungod niini niingon si Faelnar nga dili na mahimong pakgangon pa ang pagpahigayon sa Barangay ug SK elections.

Nabalaka ang ABC president nga moinat usab ang kainit sa manag-atbang nga grupo kung lugwayan ang gitakdang piniliay sa barangay.

Ang Akta Republika 9340 nga naaprubahan niadtong Mayo 2005 nagmando sa dungan nga pagpahigayon sa Barangay ug SK elections, sa katapusang Lunes sa Oktubre 2007.

Apan ang eight-member Liga council nga gipanguluhan sa presidente niini nga si James Marty Lim nitataw nga ang Akta Republika 8436 nagtugot na sa poll automation.

Alang sa Liga ang synchronized Barangay ug SK elections maoy labing maayo nga dry run alang sa automated presidential election unya sa tuig 2010.