Mga opisyal, polis sa Metro Cebu naukay sa problema sa tulis

Naukay karon ang kapolisan ug mga lokal nga opisyal sa Metro Cebu ug sa lalawigan nunot niining nahitabong tulis sa PenBank diha sa dakbayan sa Mandaue kapin usa ka semana ang milabay human tulisa ang armored van diha sa La Nueva.

Si Mandaue City Vice Mayor Carlo Fortuna midapit sa mga sakop sa Konseho sa pagpanday sa Robbery Threat Level Alert System nga maoy nahuna-hunaan niining taming batok sa mga tulisan.

Kun mauyonan kini sa Konseho ipatawag sa dakbayan ang mga tagdumala sa mga establisamento ug kapolisan aron ipasabot ang kaayuhan sa RTLAS.

Samtang gibasol usab karon ni Fortuna si Mayor Jonas Cortes tungod sa kapakyas niini sa pagpadali nga ma-renew sa kontrata ang mga patrol car sa dakbayan para sa kapolisan.

Gikatakdang sagupon usab sa mga opisyal sa dakbayan ang plano nga pagbutang og patong sa ulo sa mga miyembro sa Bohol Robbery Group nga maoy gidudahang mitulis sa Peninsula Rural Bank Inc. diha sa Estancia, Ibabao dakbayan sa Mandaue.

Planong hatagan og P10, 000 ngadto sa P50, 000 ang tawong makahatag og impormasyon aron madakpan ang mga suspek. Niadtong pagkahapon sa adlaw nga nahitabo ang tulis, positibong gitumbok sa usa sa mga testigos si Rodulfo Atega alyas Dupong.

Si Atega sakop sa Bohol Robbery Group nga gipanguluhan ni Casimero Garcia alyas Meloy nga mao usab ang gitumbok nga mitulis sa armored van diha sa La Nueva Supermart niadtong Agosto 13, duha sa mga gwardiya ang gipamusil usa kanila ang namatay diha sa tambalanan.

Si Sr. Supt. Alexander Abadinas, director sa Mandaue City Police Office mitug-an nga nagplano silang mokuha og cartographic sketch sa mga suspek aron mas mapadali ang pag-ila kanila.

Samtang atol ning pagsulat sa balita wala pay opisyal nga deklarasyon ang maong bangko kun pila gyud ang nadala sa mga tulisan, samtang gisusi na usab ang posibilidad nga dunay inside job sa hitabo.

Si Supt. Louie Oppus, hepe sa Lapu-Lapu Police Station kansang grupo maoy nakadakop sa mga sakop sa Aldemita Robbery Group maoy unang miisa sa alarma nga dunay impormasyon silang nakuha gikan sa mga dinakpan nga dunay sunod-sunod nga mga tulis sa Metro Cebu nga giplanuhan sa mga tulisan.

Si Oppus mimando na karon og dobleng pagbantay sa mga establisamento sa dakbayan kontra tulisan.