Trabahante sa DPWH-7 gisungag sa bus

Namatay ang trabahante sa Department of Public Works and Highways (DPWH)  dihang nadasmagan sa Ceres bus niadtong milabay’ng adlaw sa barangay Granada, lungsod sa Boljoon.

Ang biktima mao si Esmeraldo Gabato, 57 nga taga Poblacion sa lungsod sa Aloguinsan ug road maintenance sa DPWH 4th engineering district nga nagbase sa lungsod sa Dalaguete ug nadistino sa giaspalto nga dalan national sa maong dapit.

Gimaneho ni Emmanuel Rocamora, 50 anyos nga taga barangay Bato sa lungsod sa Samboan ang  Ceres bus nga nagdala sa plate number nga GWK 741 maoy nakadasmag sa biktima.

Si PO3 Ernesto Villamor gikahinabi sa Banat News miingon nga nagkuha og sugnod ang biktima sa pikas habig sa  karsada sa maong dapit dihang sa paglabang niini naigo kini sa bus.

Matud pa ni PO3 Villamor nga si Rocamora nga mitahan ngadto kanila   miingon nga gibosinahan niini ang biktima apan mipadayon sa paglabang sa karsada  hinungdan nga nadasmagan.

Dali untang gidala ang biktima sa district hospital sa maong lugar apan ang mga doktor mideklarar sa biktima nga patay na.