Nagpanon kagahapon sa buntag diha sa session hall ang mga kawani sa city hall sa dakbayan sa Talisay ug ilang gikwestiyon ang dugay nga paghatag sa 10 porsiyento nilang usbaw sa ilang mga suholan.
Si Joy Sanchez, kalihim sa City of Talisay Labor Union sa pakighinabi niini sa Banat News kagahapon sa buntag nagkanayon nga usa sa ilang gireklamo sa konseho mao ang dugay nga pagpagawas sa ilang 10 porsiyento nga usbaw sa ilang mga sweldo.
Sila si Edgardo Mabunay, Budget Officer ug Viluzminda Villarante, City Accountant nagkanayon ngadto sa mga kawani nga karong kataposang semana sa Agosto madawat ang usbaw sa ilang mga suholan.
Si Sanchez mikwestiyon nga naaprobahan na ang supplemental budget number 2 niadtong kataposang semana sa Hulyo ug nganong dugay-dugayon pa man og hatag ang mao nilang benipisyo.
Sa maong supplemental budget nalakip usab niini ang Representative Allowance and Transportation Allowance (RATA) sa mga opisyal ug mga department heads sa siyudad.
Usa usab sa gikwestiyon sa mga kawani mao ang ilang Collective Negotiation Agreement diin niadtong tuig 2005, si Mayor Socrates Fernandez adunay gipirmahang kasabutan tali sa mga kawani.
Ang mga kawani makakuha og 50 porsiyento nga CNA incentive kung adunay surplus o sobra ang budget sa travelling allowance, overtime, budget sa mga posisyon nga wala malingkuri, electricity, gasolina ug office supply.
Sa laing bahin, si Joel Balorio, bise presidente sa organisasyon nagkanayon nga wala pa usab sila mahatagi sa ilang CNA diin ilang nasuta nga adunay mga bakanteng posisyon nga walay na fill-up niini o milingkod.
Matud ni Balorio nga igo lang silang misunod sa memorandum gikan sa Department of Budget ug sa Civil Service sa benipisyo nga ilang gipaningil karon.
Apan diskresiyon lang sa mayor kung mohatag ba kini og CNA sa mga kawani.
Si Balorio midungag nga ang mga opisyal ug department heads nakadawat na sa ilang RATA samtang sila wala pa makadawat sa ilang usbaw.
Si Villarante sa iyang bahin, sa pakighinabi niini sa Banat News kagahapon sa buntag nagkanayon nga mahibaw-an sa kataposan pa sa tuig kung aduna bay surplus ang mga item nga makuhaan og CNA.
Ug kung adunay surplus buhatan pa kini og supplemental budget una pa mapagawas ang CNA.
Ang City Accountant midungag nga niadtong Hulyo pa nila nadawat ang personal schedule gikan sa DBM diin ang Human Resource maoy mobuhat og notice of salary (NOSA) adjustment dayon papirmahan kini sa mayor dayon isumiti kini sa accounting office apan ang HR wala pa makasumiti og NOSA.