Mga walay tarong balay sa siyudad ipasusi ni Labella

Ipasusi ni Konsehal Edgardo Labella ang nagkadaghang namuyo dinhi sa siyudad nga walay klarong mga panimalay.

Namatikdan sa konsehal nga halos tanang dapit sa dakbayan duna nay mga tawo nga nag-iyahay pagpangita og temporaryong kapasilungan.

Ang Division for the Welfare of the Urban Poor (DWUP) maoy giawhag sa konsehal nga mopahigayon og periodic inventory niini.

Partikular nga ipasusi ni Labella mao kadtong illegal nga namuyo sa pribado ug publikong mga luna sa dakbayan.

Lakip na niini ang nagpahimutang sa ilang mga barong-barong daplin sa kasapaan ug daplin sa kadalanan.

Buot sa konsehal nga ma-monitor ang gitawag og "informal settlers" sa siyudad ug kun kinsa kanila ang lehitimong urban poor residents.

Kini aron mahatagan og kasayuran ang mga ahensya sa gobyerno ug ang kagamhanan sa dakbayan.

Alang kang Labella  dako og matabang ang maong lakang sa paghatag og prayoridad sa siyudad sa mga programa ug proyekto nga alang sa mga urban poor.

Ang gipasabot sa konsehal mao ang Akta Republika numero 7279 kun Urban Development and Housing Act of 1992.

Kini maghatag sa kabus nga mga molupyo og desenting panimalay sa mas ubos ug maabot nga presyo, ug sa ubang serbisyo nga alang kanila.

Gitataw ni Labella nga pinaagi sa pagpahigayon og periodic inventory, malikayan ang kalibog sa gobyerno kun kinsa ang hatagan og prayoridad sa mga kabus sa siyudad.

Kini giingon makapaminos usab sa kalihukan sa pipila ka grupo o mga tawo nga nalambigit sa negosyo sa squatter.