Gibasura sa piskaliya sa Lapulapu ang kasong illegal possession of firearms and ammunitions ug kalapasan sa Comelec gun ban batok ni kanhi Cordova Mayor Arleigh Sitoy nga gisang-at sa kapolisan sa Lapulapu sa dihang ang iyang Starex van gisakmit uban sa mga armas niadtong Mayo 12.
Sa resolusyon ni 1st Assistant City Prosecutor Jesus Rodrigo Tagaan nga giaprobahan ni Lapulapu City Prosecutor Evangeline Gicale, gitataw niini nga walay igong basehanan ang maong kaso nga ipasaka batok kang Sitoy.
Sa maong resolusyon, na-establisar nga dili si Sitoy ang nagdala sa van diin nakuha ang mga nagkadaiyang kalibre sa tag-as nga armas ug kuwarta.
Matud pa ni Tagaan nga bisan pa nga ang tag-iya sa maong van si Sitoy apan wala kini magpasabot nga si Sitoy ang nagdala sa maong mga ebidensiya nga nakonpiskar sa kapolisan hinungdan maisip nga “speculations” lamang sa mga otoridad nga iya kini hinungdan sa pagbasura sa maong kaso.
Pormal nga gibawi ni Sitoy ang iyang sakyanan nga adunay plaka nga YCA 761, duha ka armas nga M-16 armalite rifle nga iya sa kagamhanang lokal sa Cordova ug ang kalibre .9mm pistol nga rehistrado sa iyang ngalan ug ang salaping cash nga mobalor og P299 mil human mimando ang piskaliya sa pag-uli niini.
Gumikan niini, si Mayor Adelino Sitoy sa Cordova, amahan ni Arleigh, nagkanayon nga misamot kalig-on ang kasong anti-graft sa Office of the Ombudsman-Visayas ug petition for disbarment nga iyang gipasaka batok kang Cebu Provincial Election Supervisor Lionel Marco Castillano.
Si Sitoy nagkanayon nga magamit kaayo nila ang resolusyon isip dugang ebidensiya batok ni Castillano. Usa ka supplemental pleading nga sukipan sa maong resolusyon sa piskaliya ang isumiter ngadto sa Ombudsman ug sa IBP.
Kahinumduman nga niadtong Mayo 12, gikonpiskar sa kapolisan sa Lapulapu ang Starex van ni Arleigh sa parking lot sa McDonald sa highway sa Pajo, Lapulapu human kini gidudahan nga anaa sulod sa maong van ang usa sa “most wanted criminal” nga si Rithelieu Amodia nga armado niadtong higayona.
Gumikan sa pagduda sa kapolisan nga adunay armas sulod sa maong van, gidala kini sa Lapulapu Police Station ug giablihan ubos sa mando ni Castillano.