Andam na ang National Statistics Office (NSO) alang sa pagpahigayon sa Population Census (Popcen 2007) sa tibuok nasud sugod karong Agosto 1.
Ang nahisgutang kalihukan niadto pa untang tuig 2005 ipahigayon, apan wala kini mahinayon tungod sa kakuwang og pundo sa gobyerno.
Dinhi sa dakbayan sa Sugbu, gatusan ka mga “enumerators” ang gipaabot nga molibot sa kinatibuk-ang siyudad sulod sa usa ka buwan nga census.
Matud ni Provincial Statistics Officer Firmo Deputado nga ang katuyoan sa kalihukan mao ang pagkuha og igong impormasyon sa namuyo sa usa ka lugar.
Kini aron mahatagan og kasayuran ang mga government planners, policy makers ug mga administrador, nga maoy basehan sa social ug economic development plans ug mga programa.
Gipadayag ni Deputado nga sagad nilang masugatan nga problema matag census mao ang kakuwang og kooperasyon sa mga molupyo.
Tungod niini, nanawagan karon ang statistics officer sa mga Sugbuanon nga mokooperar sa mga enumerator aron makuha niini ang tukmang impormasyon.
Sumala pa ni Deputado nga ang resulta sa census mahimo usab nga basehan pagmugna og laing distrito sa usa ka lokalidad.
Labing minos 250 mil ka mga molupyo ang gikinahanglan alang sa pagmugna og usa ka probinsya o distrito.
Sa katapusang census niadtong tuig 2005, ang siyudad sa Sugbu aduna lay kapin sa 718 mil ka mga molupyo.
Apan matud ni Deputado nga dunay 1.77 porsiyento nga ‘population growth rate’ ang dakbayan matag tuig.
Tungod niini gipaabot nga moabot na unya sa usa ka milyon ang populasyon sa siyudad human sa ipahigayong census karong sunod buwan.
Kini giingong igo na nga makahulma og laing distrito nga maoy plano ni Mayor Tomas Osmeña uban sa pagsakop sa lungsod sa Cordova.