Namatay sa sulod sa pansayan sa videokehan ang usa ka tawo human mabiktima sa pagpamusil ug gidagit pa ang hinigugmang babaye nga maoy nagdumala sa videoke bar.
Nahitabo ang pagpamusil sa miaging gabii sa sitio Pag-utlan, Yati, Liloan.
Ang namatay mao si Benito Bragat Alba Jr. hingkod ang panuigon nga taga Basak, Mandaue ug ang gidagit mao si Jennifer Flores, hingkod ang panuigon, dalaga ug nagpuyo sa maong dapit.
Si SPO3 Carlos Flores nga gikahinabi sa Banat News miingon nga nailhan lang sa angga nga Kim ang suspetsado nga nagpusil sa biktima.
Matud pa niya nga ang suspetsado nga nangulitawo usab kang Jennifer nga gikaatbang og lamesa nga gilingkoran sa biktima. Ang biktima misulod sa pansayan human sa iyang pagkanta alang sa pagtuman sa sugo sa lawas.
Mibarog usab ang suspetsado ug misunod usab sa pagsulod sa pansayan ug gipusil. Human sa maong pagpusil ang suspetsado nagdali sa paggawas dala si Jennifer nga nagbantay sa maong balay kalingawan.
Si SPO3 Flores miingon nga sila si SPO1 Jose Martinez ug mga kauban ang dali nga nakatubag sa maong alarma apan nakaikyas ang suspetsado ug si Jennifer maoy ilang nadakpan.
Dugang pa ni SPO3 Flores nga si Jennifer nga ilang gisukit-sukit mitug-an nga napugos na lamang kini sa pagkuyog sa pag-ikyas sa suspetsado sanglit gitionan man kini sa armas.