Multicab midaro sa kasagbotan; 10 naangol

Napulo ka tawo ang naangol lakip na niini ang drayber human ang multicab nga ilang gisakyan naputlan sa preno dayon milayat kaduha sa gutter ug midaro usab kini sa kasagbutan niadtong Miyerkules sa hapon diha sa Vista Grande, Bulacao,  Talisay.

Ang mga biktima giila sa mga polis nga sila si Lydia Tecson, 45, Judilee Belleza, 13, Enriquita Deiparine, 50, Daisy Cañada, 37, Flodeliza Belleza, 57, inahan ni Joseph Belleza, 31, drayber sa nahisgutang sakyanan, Michelle Rodriguez, 24, Wolfe Bacalso, 27, Isabelita Bacalso, 49 ug Raul Rodriguez,  5 anyos, pulos mga residente sa nahisgutan nga siyudad.

Ang maong mga biktima daling gidala sa South General Hospital sa lungsod sa Naga.

Si PO3 Elmer Saladas   sa Traffic Division mibutyag kagahapon sa buntag sa Banat News nga ang mga biktima gikan mitambong sa reception sa kasal diha sa nahisgutang lugar ug paingon na kining milugsong apan kalit lang nga naputol ang preno sa multicab nga ilang gisakyan ug wala na makontrolar ni Joseph ang manobela sa multicab nga nagtangag sa plakang GMP-146 tungod sa kakusog sa dagan niini.

Matud ni Saladas nga nagsubay sa kurbadahong karsada ang sakyanan ug milayat kini sa gutter sa karsada dayon midaro sa kasagbutan ug milayat na usab sa laing gutter hangtod nga diha na kini mihunong sa main road.

Ang paglayat-layat sa sakyanan diha sa mga gutter ang hinungdan nga nangabun-og ang mga sakay niini ug gikataho nga adunay nabalian usab sa bukog.

Sila si SPO1 Vitoriano Morales ug PO2 Ferdinand Pablo mga polis nga nadestino diha sa Traffic Division  miresponde sa maong insidente.