Naghuramentado nakapatay

Naghuramentado nga lalaki nga nakasibat human makapatay sa  kapitan ug sa asawa ug kaugalingon niining bayaw nga babaye sa miaging adlaw sa    Canlohangon,  Tabuelan ang padayon pa nga gipangita sa kapolisan.

Kini ang nasayran sa Banat News sa follow up nga gihimo kagahapon kang P02 Oliver Legaspino sa kapolisan sa maong lungsod.

Matud pa niya nga si  Insp. Camilo Gonzaga, hepe sa kapolisan sa maong lungsod  nangulo sa pagpangita sa suspetsado.

Ang gipangita mao si Paquillo Toling, 39, nga maoy nakadunggab patay nila ni    Kapitan Romualdo Montecalvo sa Camlohangon, Armingula Montecalvo nga iyang asawa ug Julieta Toling, 34, nga bayaw sa suspetsado.

Si P02 Legaspino miingon nga ang suspetsado  kalit lang nag-wild sa sulod sa ilang panimalay ug  gipanunggab ang asawa niini nga si Dina human sa pagpainom sa tambal alang sa sakit niining nervous breakdown.

Si Julieta kinsa misulay unta sa pagpakgang mao na usab ang gigukod ug gipanunggab ang bukobuko dihang naapsan nga maoy hinungdan nga namatay.

Dugang pa ni P02 Legaspino nga si Kapitan  Romualdo nga nagdali sa pagduol ug gitabang si Dina nga nagkadugo na sa samad nga dinunggaban sa kalawasan ug gikarga sa multicab alang sa pagdala sa tambalanan.

Nasuko ang suspetsado sa gihimo ni Kapitan Romualdo nga maoy hinungdan nga mao na usab ang giatubang ug gigukod dihang midagan kini paingon sa ilang kamalig ug gipanunggab.

Matud pa ni P02 Legaspino nga ang asawa sa kapitan nga nagdali unta sa pagtabang sa iyang bana   giapil usab sa pagpanunggab hangtod nga namatay ug dayong sibat pahilayo sa maong dapit.