Cebu 'staging point' sa illegal OFW sa Lebanon ipasusi

Nabalaka si konsehal Edgardo Labella sa taho nga ang Sugbu gigamit karon nga "staging point" alang sa illegal deployment sa mga OFW’s ngadto sa Lebanon.

Ang pangulo sa Task Force Lebanon nga si  Bise  Presidente Noli de Casro mao mismo ang nibutyag niini human usab makadawat sa maong report.

Gitumbok ni de Casto ang mga manpower services nga nia sa Sugbu nga maoy nang-recruit  og mga trabahante alang sa illegal deployment.

Nasayran nga ang total ban sa deployment sa mga OFW ngadto sa Lebanon gipatuman sa kagamhanan  tungod sa giingong ka-peligro sa maong nasod.

Kini tungod usab sa dili maayong kahimtang sa kahusay ug kalinaw sa Lebanon, gawas nga ang ubang employer gikatahong ni-maltrato sa ilang mga empleyado.

Matud ni  Labella nga angayang masusi ang gibutyag sa bise presidente tungod kay kini usa ka responsable nga opisyal sa gobyerno.

Gawas niini, dako usab ang pagtuo sa konsehal nga dunay kamatuuran ang gibutyag ni de Castro tungod kay ang Sugbu giingong maoy sentro sa tanang kalihukan sa Kabisay-an.

Subay niini, usa ka resolusyon ang ipalabang ni  Labella  nga mag-awhag sa hingtungdang mga ahensya pagsusi sa maong taho.

Partikular na niini ang Philippine Overseas Employment Administration (POEA-7), ug ang Overseas Workers Welfare Administration (OWWA-7)  nakabase dinhi sa Sugbu.

Hinuon ang bise presidente mimando na sa nahisgutang mga ahensya nga sulbaron ang maong problema.

Ang POEA ug OWWA mga sakop usab sa Task Force Lebanon nga gipanguluhan ni de Castro.