Econg ipasuspenso sab sa taga-Pasil

Usa ka Joseph Reyes nga molupyo sa barangay Pasil ning dakbayan sa Sugbu misuwat ngadto sa  Korte Suprema ug miawhag nga ipaapil si Regional Trial Court  RTC-Branch 9 Judge Geraldine Faith Econg sa upat ka mga huwes nga gisuspenso tungod sa marriage scam.

Ang maong suwat reklamo ni Reyes iya usab gipadala  ngadto sa tanang mga huwes sa RTC ug MTCC ingon man sa mga sakop sa media  ug copy furnish ngadto nila ni Rullyn Garcia, ang labaw sa Supreme Court Audit Team ug Justice Cristopher Lock.

Nabutang sa maong suwat reklamo ni Reyes nga susama ra og nahimo nga kalapasan si Judge Econg sa upat ka mga huwes nga gi-suspenso tungod sa marriage scam hinungdan nga angay lang usab kining apilon.

Ang mga huwes nga gisuspenso gumikan sa maong kontrobersiya naglangkob nila ni  Judge Anatalio Necesario sa Branch 2, Judge Gil Acosta sa Branch 3, Rosabella Tormis sa Branch 4 og Judge Edgemelo Rosales sa Branch 8.

Kini human masuta sa Supreme Court Audit Team ang mga discrepancies sa mga marriage licenses sa mga kasal nga ilang napahigayon sama sa kakulang sa mga supporting documents niini ug gawas pa gi-overprice pa kini.

Dunay pipila ka mga kopya sa marriage licenses nga gisukip si Reyes diha sa iyang suwat reklamo batok kang   Econg aron pamatud-an ang mga susamang kalapasan nga nahimo sa maong huwes.

Apan si Econg, sa iyang bahin nagtuo nga nagikan ra sa mga empliyado sa korte nga naglagot kaniya ang maong suwat reklamo  ug gani nihulga kining mo resign tungod kay gikapoy na siya sa kanunay'ng mga intriga.

Kagahapong adlawa, daling nagpa-drugtest si Econg didto sa buhatan sa NBI ug nagplano usab kini nga iyang ipa-apil og drug test ang tanan niyang mga staff sa RTC Branch-9.