Del Mar di manginlabot sa away ni Tomas, Mary Ann

Dili manginlabot si Kongresista Raul del Mar sa kasungian tali nila  ni Mayor Tomas Osmeña ug ni Kapitan Mary Ann delos Santos sa Lahug.

Kini bisan pa man og nagkainit ang panagbangi tali sa mayor ug sa kapitan sa miaging mga adlaw.

Kamatuoran niini, gipahunong ni Osmeña ang katukoran sa upat ka andana nga school building diha sa nahisgutang barangay.

Wala pa matagbaw ang mayor gitangtangan pa sa gas allowance ang mga sakyanan sa Lahug lakip na sa garbage trucks niini.

Samtang giputol usab ni Osmeña ang dugang honorarium sa siyudad alang sa mga garbage collector diha sa maong barangay.

Kini human masayod ang mayor nga gipatuo ni delos Santos ang mga molupyo sa Lahug  nga walay nahimong proyekto ang dakbayan sa ilang lugar.

Apan alang kang del Mar, normal ra ang maong sitwasyon ug walay angayang hiluton taliwala sa tataw nga panagsungi sa duha ka opisyal.

Labaw nang dili magpatunga ang kongresista sa panagbingkil nila ni Osmeña ug delos Santos bisan pa man og mga konstituwente usab niini ang naapektohan.

Kini tungod  sa pagtuo ni del Mar nga walay  kabubut-on nga angayang mauli sa duha ka nagkasunging opisyal.

Gipadayag hinuon sa kongresista nga siya makighinabi una kang Mayor Osmeña labot sa pagpahunong niini sa katukoran sa school building diha sa Lahug.

Apan nagtuo nang daan si del Mar nga dunay mga rason ang mayor  sa  lakang  niini  nga giingong  angayan usab nga i-konsiderar.

Sumala sa kongresista nga posibleng dunay nakita nga laing barangay si Osmeña nga angayang hatagan og prayoridad pagtukod og tunghaan.