Mary Ann papangayuog ‘sorry’– Tomas

Si Cebu City Mayor Tomas Osmeña miawhag  ni Kapitan Mary Ann Delos Santos sa barangay Lahug nga mangayog pasaylo sa iyang mga lumolupyo labot sa mga pamahayag niini nga ang mayor walay nahimo nga proyekto sa iyang barangay.

Kini human usab nitiyabaw si Delos Santos ning iyang lakang nga pagpahunong sa 15 milyones nga proyekto pagtukod og tunghaan diha sa Barangay Lahug.

Si Osmeña mipasabot nga wala na kinahanglana pa nga mangayo si Delos Santos ngadto kaniya og pasaylo  ug mas makaayo kun ang kapitan adto nalang mangayog pasaylo sa iyang mga lumolupyo labot sa mga iresponsableng pamahayag niini batok kaniya.

Ang mayor miklaro nga si Delos Santos nipakatap og flyers sa milabay’ng election nga wala siyay proyekto sa Lahug usa kini ka iresponsable nga lider gumikan kay dili unta niini buhaton ang ingon niadtong lakang kini tungod kay  ang kagamhanan sa dakbayan nihatag gyud og hinabang sa Lahug.

Matud pa niini nga ang tanang kalye sa maong barangay iyang gipaaspalto unya wala usab makit-i sa kapitan ang iyang tag 800  litros sa gasolina nga hinabang sa garbage trucks sa maong lugar ingon man ang iyang paghatag og honorarium sa mga barangay tanod.

Iyang giklaro nga bisan paman kun gipahayag niini nga wala moagi sa iyang buhatan ang mga proyekto sa dakbayan iresponsable gyud si Delos Santos nga lider ug dili unta siya mohimog pamahayag nga sama niadto kay  dili siya ordinaryong tawo kun dili usa ka kapitan.

Dugang pa sa mayor nga adunay mga dokumento nga iyang ikapamatuod nga daghang gibubo nga proyekto sa maong barangay ang dakbayan  apan wala lang makit-I ni Delos Santos.