Namusil gisikop sa 2 ka off-duty cops

Gidemalas ang usa ka lalaki human misuway og pusil sa iyang kontra diha sa dalan Sanciangko apan iyang armas wala mobuto maong siya pay nadunggaban, apan nadungagan ang demalas niini dihang nadakpan siya sa duha ka off-duty nga mga polis dihang siya gitabangan og gukod sa mga tawo.

Ang gidakop giilang si Jasper Rosas alyas Dakmats ug Eploy,29, ug residente sa Rizal Avenue Extension sa Mambaling human kini makuhai og usa ka kalibre 22 rebolber nga may tulo ka buhing bala ug usa ka basiyo.

Ang midakop kaniya mao sila si SPO1 Filomeno Mendaros sa Criminal Investigation and Intelligence Branch ug PO2 Roweno Gabutan sakop sa Mobile Patrol Group.

Ang duha ka polis pareho nang mopauli sa ilang mga balay apan wala magkuyog nianang tungora. Apan samtang sila naglakaw sa maong dapit nakamatikod sila sa komosyon sa mga tawo ug nakit-an nila  si Rosas nga nagdagan ug mipabuto sa iyang armas.

Si Rosas gigukod sa maong tawo apan wala siya makabantay nga ang iyang gikasugat mga polis. Si Mendaros daling mihupo dihang gition sa suspek ang armas duol sa nawong sa polis samtang nagdagan.

Si Mendaros ug Gabutan daling migukod sa suspek ug mipailang sila mga polis apan misutoy kini og dagan ug misakay og PUJ, diha sa maong sakyanan nila kini madakpi   sa eskina sa Colon ug Borromeo.

Nasayran nga dunay gipusil si Rosas nga iyang kaaway diha sa Sanciangko apan wala mobuto ang armas ug dali siyang gigukod sa mga kaaway, nadunggaban usab siya sa iyang walang pulsohan sa gituohang kaaway niini.

Kahinumduman nga si Rosas naaresto niadtong Mayo 18 human kini mipusil sa mamaligyaay og mansanas apan wala makaigo sa vendor ug siya maoy gibawsan sa vendor og dunggab diha sa likod hinungdan sa pagkalandig niini sa tambalanan.Wala hinuon siya pasakai og kaso sa maong vendor niadtong tungura.— Edwin Ian Melecio