Akrho mipatay sa giilogan niya’g motor

Usa ka sakop sa Alpha Kappa Rho (Akrho)nakapusil patay sa usa ka drayber nga nagdumili sa paghatag sa iyang motorsiklo sa dihang gigukod kini sa mga awtoridad  sa  Angelico,  Liloan sa milabay’ng hapon.

Ang drayber giila nga si Celso Villamor Valderama, 35,  minyo ug residente sa Pulpogan, Consolacion.

Ang nakapatay giila nga si  Archie Capangan, 21,  residente sa Poblacion, Liloan ug miyembro sa Akrho.

Sa pasiunang imbistigasyon nga gihimo sa kapolisan sa Liloan adunay nahitabong sabong sa Greenhills, Poblacion, Liloan tungod sa pista nga giselebrar sa maong lugar.

Matud pa usa ka miyembro sa Tau Gamma Phi nga si Alsio Gabutan Cacanog,  ulitawo ug nagpuyo sa sitio Dapdap, Catarman,  Liloan ang gipusil sa giingon miyembro usab sa Akrho diin nakaangkon  kini og  samad pinusilan sa iyang nawong agi sa kalibre .38.

Matud pa ni PO3 Marcelino Sarvilla nga gikahinabi sa Banat News sa dihang midagan ang suspetsado padulong sa Manila Memorial Park nakig-inilogay kini sa usa ka drayber sa motorsiklo aron  sakyan niini sa pag-ikyas tungod sa paggukod sa mga polis.

Apan nagdumili si Valderama sa paghatag hinungdan nga gipusil kini  sa suspetsado sa ikaduhang higayon nga naigo sa iyang aping ug sa luyong bahin sa iyang lawas.

Matud pa ni Sarvilla nga nakit-an pa gyud sa duha ka polis nga miresponde sa maong alarma nga sila si PO3 Marlon Yrog-irog ug PO3 Ernesto Pepito nga nahagba na ang biktima tungod sa pagpusil sa suspetsado ngadto kaniya.

Hinungdan nga nakahukom ang duha ka polis nga magpasalba  apan nisukol og pabuto ang suspetsado hinungdan nga nahitabo ang pinusilay.

Apan ang suspetsado naigo sa iyang tuhod ug midesisyon nga mohunong na lang ug maoy hinungdan nga nadakpan kini sa mga awtoridad.  Nakuha gikan sa suspetsado  ang  kalibre .38  nga rebolber nga adunay lima ka kabhang ug usa ka “misfired” nga bala nga anaa pa sa sulod sa tamber niini.

Ang suspetsado ug ang biktima parehong gidala sa Vicente Sotto Memorial Hospital aron naatiman ang samad pinusilan nga naangkon niini samtang ang drayber namatay gyud.