Magpabiling alerto ang kapolisan hangtod nga ikaproklamar tanang mananaog sa piniliay niadtong Lunes,matud pa ni Police Regional Director Silverio Alarcio Jr.
Sa pagkakaron, gitutokan sa kapolisan ang higpit nga pagbantay sa mga lugar diin gipahigayon ang inihapay sa mga balota.
Si Alarcio nagkanayon nga ang kapolisan sa tibuok nasud gipahimutang sa alert status sukad pa niadtong bisperas sa election base sa kamandoan ni PNP Chief Director General Oscar Calderon.
Sayo niini gibutyag ni Calderon nga base sa ilang kasinatian naa ang mga dagkong hitabo sa panahon sa inihapay sa balota.
Hinuon human sa proklamasyon sa mga mananaog ang isunod nga gimbuhaton sa kapolisan mao ang pagpasaka og kiha batok sa mga tawong utok sa mga krimeng nahitabo nga may labot sa politika sukad pa sa buwan sa Enero ning tuiga.
Si Chief Superintendent Samuel Pagdilao tigpamaba sa PNP miingon nga nakarekord silag 217 ka mga election-related violent incidents (ERVIs) sa tibuok nasud diin 128 ka tawo ang namatay nga naglakip sa 60 ka mga kandidato ug may 149 nga samdan.
Hinuon matud pa ni Pagbilao nga sa 217 ka ERVIs, 72 niini ang gitawag nga "politically motivated" nga krimen.
Ang usa ka krimen matawag nga politically motivated kon ang usa ka kandidato o kaha iyang suporter ang mihimo sa ingon aron matagbaw ang iyang kaugalingong kahakog sa politika.
Sa bahin sa militar, si Lt. Col. Jefferson Omandan, tigpamaba sa Central Command nagkanayon nga sama usab sa kapolisan, ang ilang pagka-alerto gitumong aron pagsanta kon dunay mga terorista o kaha komunista nga mosuway sa pagsabawg og kagubot panahon sa election o kaha sa pagkahuman niini.