Oppus sekretong ''gibalik'' sa Lapu-Lapu; Norma, Neri nanuyo

Eleksiyon sa Lapu-Lapu magkagubot kun ipatuman gyud sa Commission on Elections ang pagpabalik ni kanhi Lapu-Lapu Police Chief, Supt. Louie Oppus.

Kini ang hulga sa kampo ni OIC Mayor Norma Patalinghug atol sa press conference kagahapon sa hapon.

Atol sa maong presscon gipakita ni Kongresista Nerrisa Soon-Ruiz ang iyang nakuhang kopya sa order gikan kang PRO-7 Director Silverio Alarcio Jr. nga ang Comelec mihatag og mando nga si Supt. Oppus mahibalik sa iyang pagka-hepe sa kapolisan sa Lapu-Lapu.

Ang maong mando pinirmahan na ni Comelec Commissioner-in-Charge, Resurreccion Borra niadtong Mayo 9, hinungdan sa kakugang sa kampo ni Patalinghug sa maong hitabo.

Gitumbok sa kampo ni Patalinghug nga si Atty. Ann Jeanette Lamban, Comelec officer sa Lapu-Lapu ang mihimo sa maong request ngadto sa Comelec-Manila.

Base sa maong order ni Borra, mitugot kini sa hangyo nga pabalikon si Oppus sa Lapu-Lapu gumikan sa "hangyo sa katawhan" gumikan kay si Oppus lang ang makahimo sa kahapsay, "justifiable and more conducive" nga pagpahigayon sa limpiyo, matinud-anon ug hapsay nga piniliay karong Lunes sa Lapu-Lapu.

Gisabot ni Atty. Eugene Espidido, kandidato pagka-bise mayor sa Lapu-Lapu nga usa ka pagpanglingla ngadto kanila ang pagpabalik ni Oppus gumikan kay wala sila konsultaha ni Lamban ug bisan pagpakita sa mga tawo nga mihangyo sa Comelec sa Lapu-Lapu nga pabalikon si Oppus nga maoy iyang gibasehan sa pagsumiter ngadto sa Comelec-Manila sa maong hangyo.

Matud pa ni Espidido naghatag kini og dakong kamatuoran nga si suspendidong Mayor Arturo Radaza, Lamban sa Comelec ug Supt. Oppus sa PNP maoy magtambayayong sa pagahimuong tikas sa umaabot nga piniliay.

Gikuwestiyon usab ni Espidido ang mando ni Borra nga mihukom lang dayon sa hangyo ni Lamban ug wala kini magrespeto sa mando sa Comelec en banc nga nagpahimutang ni Supt. Noel Gillamac sa pagka-hepe sa Lapu-Lapu hulip kang Oppus sa milabay''ng bulan.

Giklaro usab ni Kongresista Soon-Ruiz nga kun wala sila moangay kang Gillamac dili unta si Oppus ang ilang ipabalik gumikan kay dakong kadudahan sa katawhan nga usa ka Comelec official maoy mopili kun kinsa ang iyang himuon nga hepe sa kapolisan.

Gumikan niini nagplano sila nga mopasaka og motion for reconsideration ngadto sa Comelec ug PNP aron kapugngan ang order nga ma-implementar ug kun mamogus man si Oppus sa paglingkod og balik sa Lapu-Lapu Police Station mapugos sila paghimo og lihok protesta atubangan sa City Hall o sa Lapu-Lapu Police Station.