Dili tinuod nga Guardo nagdumili pagbayad sa P322

Giklaro ni Ram-ram Arco, ang nag-abang sa usa ka karenderya sa Doña Maria I Village sa Punta Princesa nga dili tinuod ang mitumaw nga report nga nagdumili sa pagbayad ang kampo sa Tribu Guardo ni congressional candidate Jonathan Guardo sa gikaon sa mga supporter ug lider niini sa gikaon nga pamahaw niadtong milabay''ng duha ka semana.

Ang grupo ni Guardo nangaon sa kan-anan nga giabangan ni Arco atol sa ilang pagpanglamano sa maong lugar.

Si Arco personal nga miduaw sa buhatan sa Banat News kagahapon aron pagreklamo nga wala siya ma-interbiyu ning tigbalita sa dihang gipagawas kini sa miaging adlaw ug aron isaysay ang matuod ug kinatibuk-ang detalye sa maong hitabo.

Gipasabot ni Arco nga tungod sa kadaghan sa mga tawo sulod sa kan-anan tungod sa kadaghan sa grupo ni Guardo ug tulo lamang sila nga nagbantay niini, ilang nataligam-an ang pagkuwenta sa na-order niini.

Nahibaw-an na lang nila nga may kulang nga P322 ang nabayad sa grupo ni Guardo sa dihang natarong na nila og kuwenta ang tanan.

Apan tungod kay nanglakaw na sila si Guardo ug mga kaubanan, ang lider na lamang niini nga anaa nagbase sa barangay hall sa Punta Princesa nga maoy nahibilin sa kan-anan ang mipasalig sa pagbayad sa maong kantidad.

"Ako way gidapigan, in fairness sa side sa Tribu Guardo," sumala pa ni Arco.

Dugang pa niya nga duha ka higayon nga nagpasugo og tawo aron maningil sa kulang nga P322, apan kanunay silang dili magkaabot sa lider ni Guardo nga mipasalig pagbayad niini.

Tungod sa iyang ka-bisi sa gamay niyang negosyo wa na niya maatiman pa ang pagpaningil niini.