Dili tinuod nga nipanaw si Ricky Aznar, pasiatab ra''s kontra

Kandidato sa pagkakonsehal sa dakbayan sa Talisay ubos sa ticket sa oposisyon naapektohan sa mikuyanap nga balita sa siyudad nga siya patay na.

Si Ricky Aznar Sr. nasagmuyo sa nahisgutang balita apan gibutyag niini nga niadtong Abril 24 na-admit siya sa tambalanan og usa ka adlaw sa Sacred Heart Hospital ug upat ka adlaw sa Chong Hua Hospital tungod kay nakasinati siya og chest pain.

Apan matud ni Aznar Sr. nga ang iyang mga doktor nagkanayon nga tungod sa kahago sa iyang lawas maong nakasinati siya og panakit sa dughan ug gipaubos siya sa duha ka semana nga medication apan walay angayang kabalak-an tungod kay himsog ang iyang panglawas.

Dihang gipapahuway una si Aznar sa iyang doktor ang iyang anak nga si Ricky Jr. mao una ang nangampaniya para kaniya.

Matud sa batan-ong Aznar nga nakugang lang sila tungod kay aduna siya''y nadawat nga mga mensahe sa text gikan sa mga tigsuporta sa iyang amahan kinsa nangutana kung tinood ba nga patay na ang iyang amahan.

Si Aznar Jr. nagkanayon nga ang ilang mga tigsuporta adunay nadawat nga mga flyers niadtong Domingo kabahin sa pagkamatay sa iyang amahan apan hinoon wala sila makakuha og kopya sa maong mga flyers.

Si Aznar Sr. mibutyag sa mga tigbalita kagahapon nga dihang mibalik na siya sa iyang pagpangampaniya niadtong Sabado usa sa iyang tigsuporta diha sa Barangay San Roque ang mihikap sa iyang nawong para mapiho kung buhi ba gyud siya.

Si Aznar Sr. midungag nga wala silay matumbok nga nagpasiugda sa nahisgutang balita.