2 gipamusil nangamatay

Usa ka hamtong lalaki ang namatay human pusila sa wala mailhing tawo sa miaging pasado alas 6 sa gabii sa Bos-ogon, bukirang bahin sa San Remegio.

Giila sa kapolisan ang biktimang si Jaime Banquisio, hingkod, minyo, ug residente sa naasoyng nga dapit.

Samdan ang biktima sa tuong kilid ug ulo ginamit ang wala matinong kalibre sa armas sa gikatahapan nga maoy gikamatyan niini.

Hangtud ning pagsulat padayon pang wala mailhi sa kapolisan ang mamumuno apan gituohang bahin sa yuta ang motibo sa pagpusil sa biktima.

Si SPO1 Ernesto Alburo nga nahinabi sa Banat News niingon nga gigukod ang biktima sa usa ka wala mailhing tawo apan gisugat kini og laing tawo dayong pusil makaduha ka higayon diha sa kilid ug ulo.

Matud niya nga sa milabay’ng tuig gipusil ang uyoan sa biktima apan suwerteng wala namatay ug ang gidudahang suspek mao ang biktima nga kabahin gihapon sa panag-ilogay sa yuta.

Ang biktima bag-ohay lang naabot gikan sa Manila ug walay klarong pinuy-anan sa nahisgutang lugar.

Samtang sa laing bahin usa ka habalhabal driver ang namatay human gipusil sulod sa diskohan kagahapon sa kaadlawon sa Valencia, Carcar.

Ang biktima nailhan nga si Juanito Sarquial, 33, minyo ug residente sa sama nga dapit nailhan lang ang suspek sa ngalan nga Ryan.

Si Sarquial naigo sa bukobuko ug ang bala nilapos sa tiyan ginamit ang wala matinong kalibre sa armas.

Base sa taho ang biktima nisayaw sulod sa diskohan ug kalit kining gipusil sa suspek ug daling miikyas palayo sa lugar.

Gituohan sa kapolisan nga paregla ang motibo sa pagpamusil.