Dakbayan sa Sugbu mohigpit og patuman sa Solid Waste Segregation Program

Giawhag sa konseho sa dakbayan sa Sugbu ang Department of Science and Technology (DOST) nga tun-an ang posibilidad alang sa planong pagbutang og centralize trading markets alang sa mga gi-segregate nga mga basura nga plastic aron hingpit nga ikapatuman dinhi sa dakbayan ang "Solid Waste Segregation Program".

Si konsehal Arsenio Pacaña maoy nangamahan sa resolusyon niini aron ma-recycle ang mga plastic shopping bags nga ipanglabay human magamit nga makahatag og environmental hazard nga sa mga Sugbuanon.

Tinguha usab sa konsehal nga pinaagi unya niini hingpit nang mapatuman ang segregation law dinhi sa dakbayan sama sa paglain sa mga basura nga malata ug dili malata nga una nang gipatuman niadtong petsa 1 sa Hulyo sa tuig 2005.

Kini tungod kay duna naman unya''y mga kompaniya nga mamalit og mga recycle nga basurang mga plastic aron magamit sa laing katuyoan nga mapahimuslan sa publiko.

Subay sa Akta Republika No. 9003 "Ecological Solid Waste Management Act of 2000" nga nag-obligar sa tanang lokal nga kagamhanan nga mopatuman sa mga lagda alang sa hustong paglain ug paghipos sa mga basura nga malata ug dili malata.

Apan nahimong walay kapuslanan ang maong programa human wala hingpit mapatuman ang pagtuon sa publiko nga makat-on sa paglain og hipos sa mga basura nga malata ug dili malata.

Gawas nga gihulagway nga environmental hazard ang mga plastic nga basura makahatag usab kini og problema sama sa pagkabara sa mga kanal nga moresulta sa baha.